प्रवासानन्तराद् मानानन्तरः; स यथा—(सक. ५. २८५)
न स्पृष्टोऽपि त्रिदशसरिता दूरमीर्ष्यानुबन्धा— न्नाप्युन्मृष्टो भुजगपतिना तर्जनाभिर्जयायाः।
मानस्यान्ते नयनसलिलैः क्षालितः शैलपुञ्याः पत्युर्मौलौ नतिजुषि जयत्यात्मनः पादपांसुः॥ ४४॥
मानानन्तरात् प्रथमानुरागानन्तरः; स यथा—(नागा. ३.४)
दृष्टा दृष्टिमधो दधाति, कुरुते नालापमाभाषिता शय्यायां परिवृत्य तिष्ठति, बलादालिङ्गिता वेपते।
निर्यान्तीषु सखीषु वासभवनान्निर्गन्तुमेवेहते जाता वामतयैव सम्प्रति मम प्रीत्यै नवोढा प्रिया॥ ४५।।
परः परो रागवर्धन' इति प्रथमानुरागानन्तरान्मानानन्तरः; स यथा—
उन्नमय्य सकचग्रहमास्यं चुम्बति प्रियतमे हठवृत्त्या।
हुं हु मुञ्च मममेति च मन्दं जल्पितं जयति मानवतीनाम्॥ ४६॥