निषादपतिना यत्र स्निग्धेनासीत् समागमः॥ ९६॥
कटु क्षिपन्तो वयमत्र दृष्टास्तातेन पृष्ठे निहितः करो मे।
अस्मिंस्त्वकस्मादपि तोषितेन विचुम्बितस्त्वं बहुशः कपोले॥ ९७॥
७. तत्त्वानुपाती वितर्को यथा—(किराता. १६.१९)
पुंसः पदं मध्यममुत्तमस्य द्विधैव कुर्वन् धनुषः प्रणादैः।
नूनं तथा नैष यथाऽस्य वेषः प्रच्छन्नमप्यूहयते हि चेष्टा॥ ९८॥
न मृगः खलु कोऽप्ययं जिघांसुः स्खलति ह्यत्र तथा भृशं मनो मे।
विमलं कलुषीभवच्च चेतः कथयत्येव हितैषिणं रिपुं वा॥ ९९॥