निर्वाणवैरदहनाः प्रशमादरीणां नन्दन्तु पाण्डुतनयाः सह माधवेन।
रक्तप्रसाधितभुवः क्षतविग्रहाश्च स्वस्था भवन्तु कुरुराजसुताः सभृत्याः॥ १६३॥
समुत्पन्नार्थबाहुल्याज्ज्ञेयः परिकरस्तु सः॥ १६४॥
यथा रत्नावल्याम्— अन्यथा क्व सिद्धादेशप्रत्ययप्रार्थितायाः सिंहलेश्वरदुहितुः समुद्रे प्रवहणभङ्गनिमग्नायाः फलकासादनम् रत्नमालाचिह्नायाः परिज्ञायेहानयनम्, इति यावत्॥
यथा च वेणीसंहारे भीमः— सहदेव, उच्यतां मद्वचनादार्यः— (वेसं. १.११)
युष्मच्छासनलङ्घनाम्भासि मया मग्नेन नाम स्थितं प्राप्ता नाम विगर्हणा स्थितिमतां मध्येऽनुजानामपि।
क्रोधोल्लासितशोणितारुणगदस्योच्छिन्दतः कौरवा— नद्यैकं दिवसं ममासि न गुरुर्नाहं विधेयस्तव॥ १६५॥