बीभत्सादन्यतोऽपि भयानको दृश्यते, यथा—(किराता. ३.१९)
यस्मिन्ननैश्वर्यकृतव्यलीकः पराभवं प्राप्त इवान्तकोऽपि।
धुन्वन् धनुः कस्य रणे न कुर्यान्मनो भयैकप्रवणं स भीष्मः॥ ७५॥
बीभत्सादपि न दृश्यते, यथा—(मवीच. ५.२९)
तत्क्रूरदन्तकरपत्रनिकृत्तसत्त्वसङ्घातनिस्सरदसृक्प्लुतकूर्चगुच्छम् ।
वक्त्रं वपुश्च विकृताकृति दीर्घबाहोरार्येण राक्षसकुतूहलिना न दृष्टम्॥
अथ प्रकृतिभूतेभ्य इति पक्षः।
तत्रापि किं शृङ्गाराद्धास्यो जायते ? उत शृङ्गार एव हास्यो भवति ?
यदि शृङ्गाराद्धास्यो जायते, तदिष्यत एव।