एष नूनं तवात्मगतो मनोरथः । (इति कलशमावर्जयति)
अपि नाम कुलपतेरियमसवर्णक्षेत्रसंभवा स्यात् ।अथवा कृतं संदेहेन
असंशयं क्षत्रपरिग्रहक्षमा यदार्यमस्यामभिलाषि मे मनः । सतां हि संदेहपदेषु वस्तुषु प्रमाणमन्तःकरण प्रवृत्तयः ॥
Metre: वंशस्थम्
तथापि तत्त्वत एनामुपलभ्ये ।
(ससंभ्रमम्)अम्भो । सलिलसेकसंभ्रमोद्गतो नवमालिकामुज्झित्वा वदनं मे मधुकरोऽभिवर्तते (इति भ्रमरबाधां रूपयति)
चलापाङ्गां दृष्टिं स्पृशसि बहुशो वेपथुमतीम् रहस्याख्यायीव स्वनसि मृदु कर्णान्तिकचरः । करौ व्याधुन्वत्याः पिबसि रतिसर्वस्वमधरम् वयं तत्त्वान्वेषान्मधुकर हतास्त्वं खलु कृती ॥
Metre: शिखरिणी
न एष ध्र्ष्टो विरमति ।अन्यतो गमिष्यामि । कथमितोऽप्यागच्छति । हला परित्रायेथां मामनेन दुर्विनीतेन मधुकरेणाभिभूयमानाम् ।
(सस्मितम्) के आवां परित्रातुम् । दुष्यंतमाक्रन्द । राजरक्षितव्यानि तपोवनानि नाम ।
राजा अवसरोऽयमात्मानं प्रकाशयितुम् । न भेतव्यं न भेतव्यम् (इत्यर्धोक्ते स्वगतम्) राजभावस्त्वभिज्ञातो भवेत् । भवत्वेवं तावदभिधास्ये ।