तानीव गत्वा पितृलोकमेनमरञ्जयन्यानि स जामदग्न्यः । छित्त्वा शिरोस्त्राणि सहस्रबाहोर्विस्राणि विश्राणितवान्पितृभ्यः ॥
Metre: उपजातिः
अकर्णनासस्त्रपते मुखं ते पश्यन्न सीतास्यमिवाभिरामम् । रक्तोस्रवर्षी बत लक्ष्मणाभिभूतः शशी शूर्पणखामुखाभः ॥
Metre: उपजातिः
आदत्त दीप्रं मणिमम्बरस्य दत्त्वा यदस्मै खलु सायधूर्तः । रज्यत्तुषारद्युतिकूटहेम तत्पाण्डु जातं रजतं क्षणेन ॥
Metre: इन्द्रवज्रा
बालेन नक्तंसमयेन मुक्तं रौप्यं लसद्बिम्बमिवेन्दुबिम्बम् । भ्रमिक्रमादुज्झितपट्टसूत्रनेत्रावृतिं मुञ्चति शोणिमानम् ॥
Metre: उपजातिः
ताराक्षरैर्यामसिते कठिन्या निशालिखद्व्योम्नि तमःप्रशस्तिम् । विलुप्य तामल्पयतोऽरुणेऽपि जातः करे पाण्डुरिमा हिमांशोः ॥
Metre: उपजातिः
सितो यदात्रैष तदान्यदेशे चकास्ति रज्यच्छविरुज्जिहानः । तदित्थमेतस्य निधेः कलानां को वेद वा रागविरागतत्त्वम् ॥
Metre: उपजातिः
कश्मीरजै रश्मिभिरौपसंध्यैर्मृष्टं धृतध्वान्तकुरङ्गनाभि । चन्द्रांशुना चन्दनचारुणाङ्गं क्रमात्समालम्भि दिगङ्गनाभिः ॥
Metre: उपजातिः
विधिस्तुषारर्तुदिनानि कर्तंकर्तं विनिर्माति तदन्तभित्तैः । ज्योत्स्नीर्नचेत्तत्प्रतिमा इमा वा कथं कथं तानि च वामनानि ॥
Metre: उपजातिः
इत्युक्तिशेषे स वधूं बभाषे सूक्तिश्रुतासक्तिनिबद्धमौनाम् । मुखाभ्यसूयानुशयादिवेन्दौ केयं तव प्रेयसि मूकमुद्रा ॥
Metre: उपजातिः
शृङ्गारभृङ्गारसुधाकरेण वर्णस्रजानूपय कर्णकूपौ । त्वच्चारुवाणीरसवेणितीरं तृणानुकारः खलु कोषकारः ॥
Metre: उपजातिः