दिने मम द्वेषिणि कीदृगेषां प्रचार इत्याकलनाय चारीः । छाया विधाय प्रतिवस्तुलग्नाः प्रावेशयत्प्रष्टुमिवान्धकारः ॥
Metre: उपजातिः
ध्वान्तस्य तेन क्रियमाणयेत्थं द्विषाः शशी वर्णनयाऽथ रुष्टः । उद्यन्नुपाश्लोकि जपारुणश्रीर्नराधिपेनानुनयेच्छयेव ॥
Metre: उपजातिः
पश्यन्वृतोऽप्येष निमेषमद्रेरधित्यकाभूमितिरस्करिण्या । प्रवर्षति प्रेयसि चन्द्रिकामिश्चकोरचञ्चूचुलुकप्रमिन्दुः ॥
Metre: उपजातिः
ध्वान्ते द्रुमान्तानभिसारिकास्त्वं शङ्कस्व सङ्केतनिकेतमाप्ताः । छायाच्छलादुज्झितनीलचेला ज्योत्स्नानुकूलैश्चरिता दुकूलैः ॥
Metre: इन्द्रवज्रा
त्वदास्यलक्ष्मीमुकुरं चकोरैः स्वकौमुदीमादयमानमिन्दुम् । दृशा निशेन्दीवरचारुभासा पिबोरु रम्भातरुपीवरोरु ॥
Metre: उपेन्द्रवज्रा
असंशयं सागरभागुदस्थात्पृथ्वीधरादेव मथः पुरायम् । अमुष्य यस्मादधुनापि सिन्धौ स्थितस्य शैलादुदयं प्रतीमः ॥
Metre: उपजातिः
निजानुजेनातिथितामुपेतः प्राचीपतेर्वाहनवारणेन । सिन्दूरसान्द्रे किमकारि मूर्ध्नि तेनारुणश्रीरयमुज्जिहीते ॥
Metre: उपजातिः
यत्प्रीतिमद्भिर्वदनैः स्वसाम्यादचुम्बि नाकाधिपनायिकानाम् । ततस्तदीयाधरयावयोगादुदेति बिम्बारुणबिम्ब एषः ॥
Metre: उपजातिः
विलोमिताङ्कोत्किरणाद्दुरूहदृगादिना दृश्यविलोचनादि । विधिर्विधत्ते विधुना वधूनां किमाननं काञ्चनसञ्चकेन ॥
Metre: उपेन्द्रवज्रा
( अनेन वेधा विपरीतरूपविनिर्मिताङ्कोत्किरणाङ्गकेन । त्वदाननं दृश्यदृगाद्यलक्ष्यदृगादिनैवाकृत सञ्चकेन ॥
Metre: उपेन्द्रवज्रा