स्वेन पूर्यत इयं सकलाशा भो बले न मम किं भवतेति । त्वं बटुः कपटवाचि पटीयान्देहि वामन मनःप्रमदं नः ॥
Metre: स्वागता
दानवारिरसिकायविभूतेर्वश्मि तेऽस्मि सुतरां प्रतिपत्तिम् । इत्युदग्रपुलकं बलिनोक्तं त्वां नमामि कृतवामनमायम् ॥
Metre: स्वागता
भोगिभिः क्षितितले दिवि वासं बन्धमेष्यसि चिरं ध्रियमाणः । पाणिरेष भुवनं वितरेति छद्मवाग्भिरव वामन विश्वम् ॥
Metre: स्वागता
आशयस्य विवृतिः क्रियते किं दित्सुरस्मि हि भवच्चरणेभ्यः । विश्वमित्यभिहितो बलिनास्मान्वामन प्रणतपावन पायाः ॥
Metre: स्वागता
क्षत्त्रजातिरुदियाय भुजाभ्यां या तवैव भुवनं सृजतः प्राक् । जामदग्न्यवपुषस्तव तस्यास्तौ लयार्थमुचितौ विजयेताम् ॥
Metre: स्वागता
पांसुला बहुपतिर्नियतं या वेधसारचि रुषा नवखण्डा । तां भुवं कृतवतो द्विजभुक्तां युक्तकारितरता तव जीयात् ॥
Metre: स्वागता
कार्तवीर्यभिदुरेण दशास्ये रैणुकेय भवता सुखनाश्ये । कालभेदविरहादसमाधिं नौमि रामपुनरुक्तिमहं ते ॥
Metre: स्वागता
हस्तलेखमसृजत्खलु जन्मस्थानरेणुकमसौ भवदर्थम् । राम राममधरीकृततत्तल्लेखकः प्रथममेव विधाता ॥
Metre: स्वागता
उद्भवाजतनुजादज कामं विश्वभूषण न दूषणमत्र । दूषणप्रशमनाय समर्थं येन देव तव वैभवमेव ॥
Metre: स्वागता
नो ददासि यदि तत्त्वधियं मे यच्छ मोहमपि तं रघुवीर । येन रावणचमूर्युधि मूढा त्वन्मयं जगदपश्यदशेषम् ॥
Metre: स्वागता