नापगेयमनयः सशरीरं द्यां वरेण नितरामपि भक्तम् । मा स भूत्सुरवधूसुरतज्ञो दिव्यपि व्रतविलोपभियेति ॥
Metre: स्वागता
घातितार्कसुतकर्णदयालुर्जैत्रितेन्दुकुलपार्थकृतार्थः । अर्धदुःखसुखमभ्यनयस्त्वं सास्रुभानुविहसद्विधुनेत्रः ॥
Metre: स्वागता
प्राणवत्प्रणयिराध न राधा पुत्रशत्रुसखिता सदृशी ते । श्रीप्रियस्य सदृगेव तवश्रीवत्समात्महृदि धर्तुमजस्रम् ॥
Metre: स्वागता
तावकापरतनोः सितकेशस्त्वं हली किल स एव च शेषः । साध्वसाववतरस्तव धत्ते तज्जरच्चिकुरनालविलासः ॥
Metre: स्वागता
हृद्यगन्धवहभोगवतीशः शेषरूपमपि बिभ्रदशेषः । भोगभूतिमदिरारुचिरश्रीरुल्लसत्कुमुदबन्धुरुचिस्त्वम् ॥
Metre: स्वागता
रेवतीशसुषमा किल नीलस्याम्बरस्य रुचिरा तनुभासा । कामपाल भवतः कुमुदाविर्भावभावितरुचेरुचितैव ॥
Metre: स्वागता
एकचित्तततिरद्वयवादिन्नत्रयीपरिचितोऽथ बुधस्त्वम् । पाहि मां विधुतकोटिचतुष्कः पञ्चबाणविजयी षडभिज्ञः ॥
Metre: स्वागता
तत्र मारजयिनि त्वयि साक्षात्कुर्वति क्षणिकतात्मनिषेधौ । पुष्पवृष्टिरपतत्सुरहस्तात्पुष्पशस्त्रशरसंततिरेव ॥
Metre: स्वागता
तावके हृदि निपात्य कृतेयं मन्मथेन दृढधैर्यतनुत्रे । कुण्ठनादतितमां कुसुमानां छत्त्रमित्त्रमुखतैव शराणाम् ॥
Metre: स्वागता
यत्तव स्तवविधौ विधिरास्ये चातुरीं चरति तच्चतुरास्यः । त्वय्यशेषविदि जाग्रति शर्वः सर्वविद्ब्रुवतया शितिकण्ठः ॥
Metre: स्वागता