ददेऽपि तुभ्यं कियतीः कदर्थनाः सुरेषु रागप्रसवावकेशिनीः । अदम्भदूत्येन भजन्तु वा दयां दिशन्तु वा दण्डममी ममागसा ॥
Metre: वंशस्थम्
अयोगजामन्वभवं न वेदनां हिताय मेऽभूदियमुन्मदिष्णुता । उदेति दोषादपि दोषलाघवं कृशत्वमज्ञानवशादिवैनसः ॥
Metre: वंशस्थम्
तवेत्ययोगस्मरपावकोऽपि मे कदर्थनात्यर्थतयाऽगमद्दयाम् । प्रकाशमुन्माद्य यदद्य कारयन्मयात्मनस्त्वामनुकम्पते स्म सः ॥
Metre: वंशस्थम्
अमी समीहैकपरास्तवामराः स्वकिंकरं मामपि कर्तुमीशिषे विचार्य कार्यं सृज मा विधान्मुधा कृतानुतापस्त्वयि पार्ष्णिविग्रहम् ॥
Metre: वंशस्थम्
उदासितेनैव मयेदमुद्यसे भिया न तेभ्यः स्मरतानवान्न वा । हितं यदि स्यान्मदसुव्ययेन ते तदा तव प्रेमणि शुद्धिलब्धये ॥
Metre: वंशस्थम्
इतीरितैर्नैषधसूनृतामृतैः विदर्भजन्मा भृशमुल्ललास सा । ऋतोरधिश्रीः शिशिरनुजन्मनः पिकस्वरैर्दूरविकस्वरैर्यथा ॥
Metre: वंशस्थम्
नलं तदावेत्य तमाशये निजे घृणां विगानं च मुमोच भीमजा । जुगुप्समाना हि मनो धृतं तदा सतीधिया दैवतदूतधावि सा ॥
Metre: वंशस्थम्
मनोभुवस्ते भविनां मनः पिता निमज्जयन्नेनसि तन्न लज्जसे । अमुद्रि सत्पुत्रकथा त्वयेति सा स्थिता सती मन्मथनिन्दिनी धिया ॥
Metre: वंशस्थम्
प्रसूनमित्येव तदङ्गवर्णना न सा विशेषात्कतमत्तदित्यभूत् । तदा कदम्बं तदवर्णि लोमभिः मुदश्रुणा प्रावृषि हर्षमागतैः ॥
Metre: वंशस्थम्
मयैव संबोध्य नलं व्यलापि यत्स्वमाह मद्बुद्धमिदं विमृश्य तत् । असाविति भ्रान्तिमसाद्दमस्वसुः स्वभाषितस्वोद्भ्रमविभ्रमक्रमः ॥
Metre: वंशस्थम्