विदर्भराजप्रभवा ततः परं त्रपासखी वक्तुमलं न वा नलम् । पुरस्तमूचेऽभिमुखं यदत्रपा ममज्ज तेनैव महाह्रदे ह्रियः ॥
Metre: वंशस्थम्
यदापवार्यापि न दातुमुत्तरं शशाक सख्याः श्रवसि प्रियस्व सा । विहस्य सख्येव तमव्रवीत्तदा ह्रियाऽधुना मौनधना भवत्प्रिया ॥
Metre: वंशस्थम्
पदातिथेयाँल्लिखितस्य ते स्वयं वितन्वती लोचननिर्झरानियम् । जगाद यां सैव मुखान्मम त्वया प्रसूनवाणोपनिषन्निशम्यताम् ॥
Metre: वंशस्थम्
असंशयं स त्वयि हंस एव मां शशंस न त्वद्विरहाप्तसंशयाम् । क्व चन्द्रवंशस्य वतंस ! मद्वधान्नृशंसता संभविनी भवादृशे ॥
Metre: वंशस्थम्
जितस्तवयास्येन विधुः स्मरः श्रिया कृतप्रतिज्ञौ मम तौ वधे कुतः । तवेति कृत्वा यदि तज्जितं मया न मोघसङ्कल्पधराः किलामराः ॥
Metre: वंशस्थम्
निजांशुनिर्दग्धमदङ्गभस्मभिः मुधा विधुर्वाञ्छति लाञ्छनोन्मृजाम् । त्वदास्यतां यास्यति तावतापि किं वधूवधेनैव पुनः कलङ्कितः ॥
Metre: वंशस्थम्
प्रसीद यच्छ स्वशरान्मनोभुवे स हन्तु मां तैर्धुतकौसुमाशुगः । त्वदेकचित्ताहमसून्विमुञ्चती त्वमेव भूत्वा तृणवज्जयामि तम् ॥
Metre: वंशस्थम्
श्रुतिः सुराणां गुणगयनी यदि त्वदङ्घ्रिमग्नस्य जनस्य किं ततः । स्तवे रवेरप्सु कृताप्लवैः कृते न मुद्वती जातु भवेत्कुमुद्वती ॥
Metre: वंशस्थम्
कथासु शिष्यै वरमद्य न ध्रिये ममावगन्तासि न भावमन्यथा । त्वदर्थमुक्तासुतया सुनाथ ! मां प्रतीहि जावाभ्यधिक ! त्वदेकिकाम् ॥
Metre: वंशस्थम्
महेन्द्रहेतेरपि रक्षणं भयाद्यदर्थिसाधारणमस्त्रभृद्द्रतम् । प्रसूनबाणादपि मामरक्षतः क्षतं तदुच्चैरवकीर्णिनस्तव ॥
Metre: वंशस्थम्