तत्प्रयच्छाम्यस्यैकैकं प्रतिदिनं सुहृदम् । उक्तं च—
सर्वस्व-हरणे युक्तं शत्रुं बुद्धि-युता नराः । तोषयन्त्यल्प-दानेन बाडवं सागरो यथा ॥
Metre: अनुष्टुप्
यो दुर्बलोऽणूनपि याच्यमानो बलीयसा यच्छति नैव साम्ना । प्रयच्छते नैव च दर्श्यमानं खारीं स चूर्णस्य पुनर्ददाति ॥
Metre: उपजातिः
सर्व-नाशे समुत्पन्ने अर्धं त्यजति पण्डितः । अर्धेन कुरुते कार्यं सर्व-नाशो हि दुस्तरः ॥
Metre: अनुष्टुप्
न स्वल्पस्य कृते भूरि नाशयेन्मतिमान्नरः । एतदेव हि पाण्डित्यं यत्स्वल्पाद्भूरि-रक्षणम् ॥
Metre: अनुष्टुप्
एवं निश्चिन्त्य नित्यमेकैकमादिशति । सोऽपि तं भक्षयित्वा तस्य परोक्षेऽन्यानपि भक्षयति । अथवा साध्विदमुच्यते—
यथा हि मलिनैर्वस्त्रैर्यत्र तत्रोपविश्यते । एवं चलित-वित्तस्तु वित्त-शेषं न रक्षति ॥
Metre: अनुष्टुप्
अथान्य-दिने तेनापरान्मण्डूकान्भक्षयित्वा गङ्गदत्त-सुतो यमुनादत्तो भक्षितः । तं भक्षितं मत्वा गङ्गदत्तस्तार-स्वरेण धिग्धिक्प्रलाप-परः कथञ्चिदपि न विरराम । ततः स्व-पत्न्याभिहितः—