अधित कापि मुखे सलिलं सखी प्यधित कापि सरोजदलैः स्तनौ । व्यधित कापि हृदि व्यजनानिलं न्यधित कापि हिमं सुतनोस्तनौ ॥
Metre: द्रुतविलम्बित
उपचचार चिरं मृदुशीतलैः जलजनालमृणालजलादिभिः । प्रियसखीनिवहः स तथा क्रमाद् इयमवाप यथा लघु चेतनाम् ॥
Metre: द्रुतविलम्बितम्
अथ कले ! कलय श्वसिति स्फुटं चलति पक्ष्म चले ! परिभावय । अधरकम्पनमुन्नय मेनके ! किमपि जल्पति कल्पलते ! श्रृणु ॥
Metre: द्रुतविलम्बितम्
रचय चारुमति ! स्तनयोर्वृतिं कलय केशिनि ! कैश्यमसंयतम् । अवगृहाण तरङ्गिणि ! नेत्रयोः जलझराविति शुश्रुविरे गिरः ॥
Metre: द्रुतविलम्बितम्
कलकलः स तदालिजनाननाद् उदलसद्विपुलस्त्वरितेरितैः । यमधिगम्य सुतालयमीयिवान्धृतदरः स विदर्भपुरंदरः ॥
Metre: द्रुतविलम्बितम्
कन्यान्तःपुरबाधनाय यदधीकारान्न दोषा नृपं द्वौ मन्त्रिप्रवरश्च तुल्यमगदंकारश्च तावूचतुः । देवाकर्णय सुश्रुतेन चरकस्योक्तेन जानेऽखिलं स्यादस्या नलदं विना न दलने तापस्य कोऽपि क्षमः ॥
Metre: शार्दूलविक्रीडितम्
ताभ्यामभूद्युगपदप्यभिधीयमानं भेदव्यपाकृति मिथःप्रतिघातमेव । श्रोत्रे तु तस्य पपतुर्नृपतेर्न किंचिद्भैम्यामनिष्टशतशङ्कितयाकुलस्य ॥
Metre: वसन्ततिलका
द्रुतविगमितविप्रयोगचिह्नामपि तनयां नृपतिः पदप्रणम्राम् । अकलयदसमाशुगाधिमग्नां झटिति पराशयवेदिनो हि विज्ञाः ॥
Metre: पुष्पिताग्रा
व्यतरदथ पिताशिषं सुतायै नतशिरसे सहसोन्नमय्य मौलिम् । दयितमभिमतं स्वयंवरे ! त्वं गुणमयमाप्नुहि वासरैः कियद्भिः ॥
Metre: पुष्पिताग्रा
तदनु स तनुजासखीरवादीत्तुहिनऋतौ गत एव हीदृशीनाम् । कुसुममपि शरायते शरीरे तद् उचितमाचरतोपचारमस्याः ॥
Metre: पुष्पिताग्रा