स्मारं ज्वरं घोरमपत्रपिष्णोः सिद्धागदङ्कारचये चिकित्सौ । निदानमौनादविशद्विशाला साङ्क्रामिकी तस्य रुजेव लज्जा ॥
Metre: उपजातिः
बिभेति रुष्टासि किलेत्यकस्मात्स त्वां किलापेति हसत्यकाण्डे । यान्तीमिव त्वामनु यात्यहेतोः उक्तस्त्वयेव प्रतिवक्ति मोघम् ॥
Metre: उपजातिः
भवद्वियोगाच्छिदुरार्तिधारायमस्वसुर्मज्जति निःशरण्यः । मूर्च्छामयद्वीपमहान्ध्यपङ्के हा हा महीभृद्भटकुञ्जरोऽयम् ॥
Metre: उपजातिः
सव्यापसव्यत्यजनाद्द्विरुक्तैः पञ्चेषुबाणैः पृथगर्जितासु । दशासु शेषा खलु तद्दशा या तया नभः पुष्प्यतु कोरकेण ॥
Metre: उपजातिः
त्वयि स्मराधेः सततास्मितेन प्रस्थापितो भूमिभृतास्मि तेन । आगत्य भूतः सफलो भवत्या भावप्रतीत्या गुणलोभवत्याः ॥
Metre: उपजातिः
धन्यासि वैदर्भि ! गुणैरुदारैः यया समाकृष्यत नैषधोऽपि । इतः स्तुतिः कः खलु चन्द्रिकाया यदब्धिमप्युत्तरलीकरोति ॥
Metre: उपजातिः
नलेन भायाः शशिना निशेव त्वया स भायान्निशया शशीव । पुनः पुनस्तद्युगयुग्विधाता योग्यामुपास्ते नु युवां युयुक्षुः ॥
Metre: उपजातिः
स्तनद्वये तन्वि ! परं तवैव पृथो यदि प्राप्स्यति नैषधस्य । अनल्पवैदग्ध्यविवर्धिनीनां पत्रावलीनां वलना समाप्तिम् ॥
Metre: उपजातिः
एकः सुधांशुर्न कथंचन स्यात्तृप्तिक्षमस्त्वन्नयनद्वयस्य । त्वल्लोचनासेचनकस्तदस्तु नलास्यशीतद्युतिसद्वितीयः ॥
Metre: उपजातिः
अहो तपः कल्पतरुर्नलीयः त्वत्पाणिजाग्रस्फुरदङ्कुरश्रीः । त्वद्भ्रूयुगं यस्य खलु द्विपत्री तवाधरो रज्यति यत्कलम्बः ॥
Metre: उपजातिः