त्वद्वद्धबुद्धेर्बहिरिन्द्रियाणां तस्योपवासव्रतिनां तपोभिः । त्वामद्य लब्ध्वामृततृप्तिभाजां स्वदेवभूयं चरितार्थमस्तु ॥
Metre: उपजातिः
तुल्यावयोर्मूर्तिरभून्मदीया दग्धा परं सास्य न ताप्यतेऽपि । इत्यभ्यसूयन्निव देहतापं तस्यातनुस्त्वद्विरहाद्विधत्ते ॥
Metre: इन्द्रवज्रा
लिपिं दृशा भित्तिविभूषणं त्वां नृपः पिबन्नादरनिर्निमेषः । चक्षुर्झरैरर्पितमात्मचक्षूरागं स धत्ते रचितं त्वया नु ॥
Metre: उपजातिः
पातुर्दृशालेख्यनयीं नृपस्य त्वामादरादस्तनिमीलयास्ते । ममेदमित्यश्रुणि नेत्रवृत्तेः प्रीतेर्निमेषच्छिदया विवादः ॥
Metre: उपजातिः
त्वं हृद्गता भैमि ! बहिर्गतापि प्राणायिता नासिकयास्यगत्या । न चित्रमाक्रामति तत्र चित्रम् एतन्मनो यद्भवदेकवृत्ति ॥
Metre: उपजातिः
अजस्रमारोहसि दूरदीर्घो संकल्पसोपानततिं तदीयाम् । श्वासान्स वर्षत्यधिकं पुनर्यद्यानात्तव त्वन्मयतां तदाप्य ॥
Metre: उपजातिः
हृत्तस्य यन्मन्त्रयते रहस्त्वां तद्व्यक्तमामन्त्रयते मुखं यत् । तद्वैरिपुष्पायुधमित्रचन्द्रसख्यौचिती सा खलु तन्मुखस्य ॥
Metre: इन्द्रवज्रा
स्थितस्य रात्रावधिशय्य शय्यां मोहे मनस्तस्य निमज्जयन्ती । आलिङ्ग्य या चुम्बति लोचने सा निद्राधुना न त्वदृतेऽङ्गना वा ॥
Metre: उपजातिः
स्मरेण निस्तक्ष्य वृथैव बाणैः लावण्यशेषां कृशतामनायि । अनङ्गतामप्ययमाप्यमानः स्पर्धां न सार्धे विजहाति तेन ॥
Metre: उपजातिः
त्वत्प्रापकात्त्रस्यति नैनसोऽपि त्वय्येष दास्येऽपि न लज्जते यत् । स्मरेण बाणैरतितक्ष्य तीक्ष्णैः लूनः स्वभावोऽपि कियान्किमस्य ॥
Metre: उपजातिः