शक्तेनापि सता जनेन विदुषा कालान्तरापेक्षिणा वस्तव्यं खलु वाक्य-वज्र-विषमे क्षुद्रेऽपि पापे जने । दर्वी-व्यग्र-करेण धूम-मलिनेनायास-युक्ते च भीमेनातिबलेन मत्स्य-भवने किं नोषितं सूदवत् ॥
Metre: शार्दूलविक्रीडितम्
यद्वा तद्वा विषम-पतितः साधु वा गर्हितं वा कालापेक्षी हृदय-निहितं बुद्धिमान्कर्म कुर्यात् । किं गाण्डीव-स्फुरद्-उरु-गुणास्फालन-क्रूर-पाणिर्नासील्लीला-नटन-विलसन्मेखली सव्यसाची ॥
Metre: मन्दाक्रान्ता
सिद्धिं प्रार्थयता जनेन विदुषा तेजो निगृह्य स्वकं सत्त्वोत्साहवतापि दैव-विधिषु स्थैर्यं प्रकार्य क्रमात् । देवेन्द्र-द्रविणेश्वरान्तक-समैरप्यन्वितो भ्रातृभिः किं क्लिष्टः सुचिरं विराट-भवने श्रीमान्न धर्मात्मजः ॥
Metre: शार्दूलविक्रीडितम्
रूपाभिजन-सम्पन्नो माद्री-पुत्रौ बलान्वितौ । गोकर्म-रक्षा-व्यापारे विराट-प्रेष्यतां गतौ ॥
Metre: अनुष्टुप्
रूपेणाप्रतिमेन यौवन-गुणैः श्रेष्ठे कुले जन्मना कान्त्या श्रीरिव यात्र सापि विदशां काल-क्रमादागता । सैरन्ध्रीति स-गर्वितं युवतिभिः साक्षेपमाख्यातया द्रौपद्या ननु मत्स्य-राज-भवने धृष्टं न किं चन्दनम् ॥
Metre: शार्दूलविक्रीडितम्
मेघवर्ण आह—तात !असि-धारा-व्रतमिदं मन्ये यदरिणा सह संवासः ।
सोऽब्रवीत्-देव !एवमेतत् । परं न तादृङ्-मूर्ख-समागमः क्वापि मया दृष्टः । न च महाप्रज्ञमनेक-शास्त्रेष्वप्रतिम-बुद्धिं रक्ताक्षं विना धीमान् । यत्-कारणं तेन मदीयं यथावस्थितं चित्तं ज्ञातम् । ये पुनरन्ये मन्त्रिणस्ते महा-मूर्खा मन्त्रि-मात्र-व्यपदेशोपजीविनोऽतत्त्व-कुशला, यैरिदमपि न ज्ञातम् । यतः—
अरितोऽभ्यागतो भृत्यो दुष्टस्तत्-सङ्ग-तत्-परः । अपसर्प-सधर्मत्वान्नित्योद्वेगी च दूषितः ॥
Metre: अनुष्टुप्
आसने शयने याने पान-भोजन-वस्तुषु । दृष्ट्वान्तरं प्रमत्तेषु प्रहरन्त्यरयोऽरिषु ॥
Metre: अनुष्टुप्
तस्मात्सर्व-प्रयत्नेन त्रिवर्ग-निलयं बुधः । आत्मानमादृतो रक्षेत्प्रमादाद्धि विनश्यति ॥
Metre: अनुष्टुप्