तावदाश्रीयते लक्ष्म्या तावदस्य स्थिरं यशः । पुरुषस्तावदेवासौ यावन्मानान्न हीयते ॥
Metre: अनुष्टुप्
स पुमानर्थवज्जन्मा यस्य नाम्नि पुरःस्थिते । नान्यामङ्गुलिमभ्येति संख्यायामुद्यताङ्गुलिः ॥
Metre: अनुष्टुप्
दुरासदवनज्यायान्गम्यस्तुङ्गोऽपि भूधरः । न जहाति महौजस्कं मानप्रांशुमलङ्घ्यता ॥
Metre: अनुष्टुप्
गुरून्कुर्वन्ति ते वंश्यानन्वर्था तैर्वसुंधरा । येषां यशांसि शुभ्राणि ह्रेपयन्तीन्दुमण्डलम् ॥
Metre: अनुष्टुप्
उदाहरणमाशीःषु प्रथमे ते मनस्विनाम् । शुष्केऽशनिरिवामर्षो यैररातिषु पात्यते ॥
Metre: अनुष्टुप्
न सुखं प्रार्थये नार्थमुदन्वद्वीचिचञ्चलम् । नानित्यताशनेस्त्रस्यन्विविक्तं ब्रह्मणः पदम् ॥
Metre: अनुष्टुप्
प्रमार्ष्टुमयशःपङ्कमिच्छेयं छद्मना कृतम् । वैधव्यतापितारातिवनितालोचनाम्बुभिः ॥
Metre: अनुष्टुप्
अपहस्येऽथवा सद्भिः प्रमादो वास्तु मे धियः । अस्थानविहितायासः कामं जिह्रेतु वा भवान् ॥
Metre: अनुष्टुप्
वंशलक्ष्मीमनुद्धृत्य समुच्छेदेन विद्विषाम् । निर्वाणमपि मन्येऽहमन्तरायं जयश्रियः ॥
Metre: अनुष्टुप्
अजन्मा पुरुषस्तावद्गतासुस्तृणमेव वा । यावन्नेषुभिरादत्ते विलुप्तमरिभिर्यशः ॥
Metre: अनुष्टुप्