सूत चोदयाश्वान्पुण्याश्रमदर्शनेन तावदात्मानं पुनीमहे ।
यदाज्ञापयत्यायुष्मन् । (इति भूयो रथ एवं निरूपयति)
(समन्तादवलोक्य) सूत अकथितोऽपि ज्ञायत एव यथायमाश्रमाभोगस्तपोवनस्येति ।
किं न पश्यति भवान् ।इह हि
नीवाराः शुकगर्भकोटरमुखभ्रष्टास्तरूणामधः प्रस्निग्धाः क्वचिदिङ्गुदीफालभिदः सूच्यन्त एवोपलाः । विश्वासोपगमादभिन्नगतयः शब्दं सहन्ते मृगास् तोयाधारपथाश्च वल्कलशिखानिष्यन्दरेखाङ्किताः ॥
Metre: शार्दूलविक्रीडितम्
कुल्याम्भोभिः पवनचपलैः शाखिनो धौतमूला भिन्नो रागः किसलयरुचामाज्यधूमोद्गमेन ।एते चार्वागुपवनभुवि छिन्नदर्भाङ्कुरायाम् नष्टांशका हरिणशिशवो मन्दमन्दं चरन्ति ॥
Metre: उपजातिः
(स्तोकमन्तरं गत्वा) तपोवननिवासिनामुपरोधो मा भूत् ।एतावत्येव रथं स्थापय यावदवतरामि ।
धृताः प्रग्रहाः ।अवतरत्वायुष्मान् ।