विश्वामित्र-पराशर-प्रभृतयो वाताम्बु-पर्णाशनास्तेऽपि स्त्री-मुख-पङ्कजं सुललितं दृष्ट्वैव मोहं गताः । शाल्यन्नं स-घृतं पयो-दधि-युतं ये भुञ्जते मानवास्तेषामिन्द्रिय-निग्रहो यदि भवेद्विन्ध्यः प्लवेत्सागरे ॥
Metre: शार्दूलविक्रीडितम्
परिमल-भृतो वाताः शाखा नवाङ्कुर-कोटयो मधुर-विधुरोत्कण्ठा-भाजः प्रिया पिक-पक्षिणाम् । विरल-विरस-स्वेदोद्गारा वधू-वदनेन्दवः प्रसरति मधौ धात्र्यां जातो न कस्य गुणोदयः ॥
Metre: हरिणी
मधुरयं मधुरैरपि कोकिला कल-रवैर्मलयस्य च वायुभिः । विरहिणः प्रहिणस्ति शरीरिणो विपदि हन्त सुधापि विषायते ॥
Metre: द्रुतविलम्बितम्
आवासः किल-किञ्चितस्य दयिता-पार्श्वे विलासालसाः कर्णे कोकिल-कामिनी-कल-रवः स्मेरो लता-मण्डपः । गोष्ठी सत्-कविभिः समं कतिपयैर्मुग्धाः सुधांशोः कराः केषांचित्सुखयन्ति चात्र हृदयं चैत्रे विचित्राः क्षपाः ॥
Metre: शार्दूलविक्रीडितम्
पान्थ स्त्री-विरहानलाहुति-कलामातन्वती मञ्जरीमाकन्देषु पिकाङ्गनाभिरधुना सोत्कण्ठमालोक्यते ।अप्येते नव-पाटला-परिमल-प्राग्-भार-पाटच्-चरा वान्ति-क्लान्ति-वितान-तानव-कृतः श्रीखण्ड-शैलानिलाः ॥
Metre: शार्दूलविक्रीडितम्
प्रथितः प्रणयवतीनां तावत्पदमातनोतु हृदि मानः । भवति न यावच्चन्दनतरु- सुरभिर्मलय-पवमानः ॥
Metre: आर्या
सहकार-कुसुम-केसरनिकर- भरामोद-मूर्च्छित-दिग्-अन्ते । मधुर-मधुर-विधुर-मधुपे मधौ भवेत्कस्य नोत्कण्ठा ॥
Metre: उद्गीति
अच्छाच्छ-चन्दन-रसार्द्रतरा मृगाक्ष्यो धारा-गृहाणि कुसुमानि च कौमुदी च । मन्दो मरुत्सुमनसः शुचि हर्म्य-पृष्ठं ग्रीष्मे मदं च मदनं च विवर्धयन्ति ॥
Metre: वसन्ततिलका
स्रजो हृद्यामोदा व्यजन-पवनश्चन्द्र-किरणाः परागः कासारो मलयज-रजः शीधु विशदम् । शुचिः सौधोत्सङ्गः प्रतनु वसनं पङ्कज-दृशो निदाघ-र्तावेतद्विलसति लभन्ते सुकृतिनः ॥
Metre: शिखरिणी
सुधा-शुभ्रं धाम स्फुरद्-अमल-रश्मिः शशधरः प्रिया-वक्त्राम्भोजं मलयज-रजश्चातिसुरभिः । स्रजो हृद्यामोदास्तदिदमखिलं रागिणि जने करोत्यन्तः क्षोभं न तु विषय-संसर्ग-विमुखे ॥
Metre: शिखरिणी