कश्चुम्बति कुल-पुरुषो वेश्याधर-पल्लवं मनोज्ञमपि । चारभट-चोर-चेटक-नट-विट-निष्ठीवन-शरावम् ॥
Metre: आर्या
धन्यास्त एव धवलायत-लोचनानां तारुण्य-दर्प-घन-पीन-पयोधराणाम् । क्षामोदरोपरि लसत्-त्रिवली-लतानां दृष्ट्वाकृतिं विकृतिमेति मनो न येषाम् ॥
Metre: वसन्ततिलका
बाले लीला-मुकुलितममी मन्थरा दृष्टि-पाताः किं क्षिप्यन्ते विरम-विरम व्यर्थ एष श्रमस्ते । सम्प्रत्यन्ये वयमुपरतं बाल्यमास्था वनान्ते क्षीणो मोहस्तृणमिव जगज्-जालमालोकयामः ॥
Metre: मन्दाक्रान्ता
इयं बाला मां प्रत्यनवरतमिन्दीवर-दलप्रभा चीरं चक्षुः क्षिपति किमभिप्रेतमनया । गतो मोहोऽस्माकं स्मर-शबर-बाण-व्यतिकरज्वर- ज्वाला शान्ता तदपि न वराकी विरमति ॥
Metre: शिखरिणी
किं कन्दर्प करं कदर्थयसि रे कोदण्ड-टङ्कारितं रे रे कोकिल कोमलं कल-रवं किं वा वृथा जल्पसि । मुग्धे स्निग्ध-विदग्ध-चारु-मधुरैर्लोलैः कटाक्षैरलं चेतश्चुम्बित-चन्द्र-चूड-चरण-ध्यानामृतं वर्तते ॥
Metre: शार्दूलविक्रीडितम्
विरहेऽपि सङ्गमः खलु परस्परं सङ्गतं मनो येषाम् । हृदयमपि विघट्टितं चेत्सङ्गी विरहं विशेषयति ॥
Metre: उपजातिः
किं गतेन यदि सा न जीवति प्राणिति प्रियतमा तथापि किम् ।इत्युदीक्ष्य नव-मेघ-मालिकां न प्रयाति पथिकः स्व-मन्दिरम् ॥
Metre: रथोद्धता
विरमत बुधा योषित्-सङ्गात्सुखात्क्षण-भङ्गुरात्कुरुत करुणा-मैत्री-प्रज्ञा-वधू-जन-सङ्गमम् । न खलु नरके हाराक्रान्तं घन-स्तन-मण्डलं शरणमथवा श्रोणी-बिम्बं रणन्-मणि-मेखलम् ॥
Metre: हरिणी
यदा योगाभ्यास-व्यसन-कृशयोरात्म-मनसोरविच्छिन्ना मैत्री स्फुरति कृतिनस्तस्य किमु तैः । प्रियाणामालापैरधर-मधुभिर्वक्त्र-विधुभिः सनिश्वासामोदैः सकुच-कलशाश्लेष-सुरतैः ॥
Metre: शिखरिणी
यदासीदज्ञानं स्मर-तिमिर-सञ्चार-जनितं तदा दृष्ट-नारी-मयमिदमशेषं जगदिति ।इदानीमस्माकं पटुतर-विवेकाञ्जन-जुषां समीभूता दृष्टिस्त्रिभुवनमपि ब्रह्म मनुते ॥
Metre: शिखरिणी