परीक्षका यत्र न सन्ति देशे नार्घन्ति रत्नानि समुद्रजानि । आभीर-देशे किल चन्द्रकान्तं त्रिभिर्वराटैर्विपणन्ति गोपाः ॥
Metre: उपजातिः
लोहिताख्यस्य च मणेः पद्मरागस्य चान्तरम् । यत्र नास्ति कथं तत्र क्रियते रत्न-विक्रयः ॥
Metre: अनुष्टुप्
निर्विशेषं यदा स्वामी समं भृत्येषु वर्तते । तत्रोद्यम-समर्थानामुत्साहः परिहीयते ॥
Metre: अनुष्टुप्
न विना पार्थिवो भृत्यैर्न भृत्याः पार्थिवं विना । तेषां च व्यवहारोऽयं परस्पर-निबन्धनः ॥
Metre: अनुष्टुप्
भृत्यैर्विना स्वयं राजा लोकानुग्रह-कारिभिः । मयूखैरिव दीप्तांशुस्तेजस्व्यपि न शोभते ॥
Metre: अनुष्टुप्
अरैः सन्धार्यते नाभिर्नाभौ चाराः प्रतिष्ठिताः । स्वामि-सेवकयोरेवं वृत्ति-चक्रं प्रवर्तते ॥
Metre: अनुष्टुप्
शिरसा विधृता नित्यं स्नेहेन परिपालिताः । केशा अपि विरज्यन्ते निःस्नेहाः किं न सेवकाः ॥
Metre: अनुष्टुप्
राजा तुष्टो हि भृत्यानामर्थ-मात्रं प्रयच्छति । ते तु संमान-मात्रेण प्राणैरप्युपकुर्वते ॥
Metre: अनुष्टुप्
एवं ज्ञात्वा नरेन्द्रेण भृत्याः कार्या विचक्षणाः । कुलीनाः शौर्य-संयुक्ताः शक्ता भक्ताः क्रमागताः ॥
Metre: अनुष्टुप्
यः कृत्वा सुकृतं राज्ञो दुष्करं हितमुत्तमम् । लज्जया वक्ति नो किञ्चित्तेन राजा सहायवान् ॥
Metre: अनुष्टुप्