ओजो महौजाः कृत्वाधस्तत्क्षणादुत्तमौजसः । कुर्वन्नाजावमुख्यत्वमनमन्नाम मुख्यताम् ॥
Metre: अनुष्टुप्
दूरादेव चमूर्भल्लैः कुमारो हन्ति स स्म याः । न पुनः सांयुगीं ताः स्म कुमारो हन्ति सस्मयाः ॥
Metre: अनुष्टुप्
निपीड्य तरसा तेन मुक्ताः काममनास्थया । उपाययुर्विलक्षत्वं विद्विषो न शिलीमुखाः ॥
Metre: अनुष्टुप्
तस्यावदानैः समरे सहसा रोमहर्षिभिः । सुरैरशंसि व्योमस्थैः सह सारो महर्षिभिः ॥
Metre: अनुष्टुप्
सुगन्धयद्दिशः शुभ्रमम्लानि कुसुमं दिवः । भूरि तत्रापतत्तस्मादुत्पपात दिवं यशः ॥
Metre: अनुष्टुप्
सोढुं तस्य द्विषो नालमवयोधरवा रणम् । ऊर्णुनाव यशश्च द्यामपयोधरवारणम् ॥
Metre: अनुष्टुप्
केशप्रचुरलोकस्य पर्यस्कारि विकासिना । शेखरेणेव युद्धस्य शिरः कुसुमलक्ष्मणा ॥
Metre: अनुष्टुप्
सादरं युद्धमानापि तेनान्यनरसादरम् । सा दरं पृतना निन्ये हीयमाना रसादरम् ॥
Metre: अनुष्टुप्
इत्यालिङ्गतामालोक्य जयलक्ष्म्या झषध्वजम् । क्रुद्धयेव क्रुधा सद्यः प्रपेदे चेदिभूपतिः ॥
Metre: अनुष्टुप्
अहितानभि वाहिन्या स मानी चतुरङ्गया । चचाल वल्ल्गत्कलभसमानीचतुरङ्गया ॥
Metre: अनुष्टुप्