कथं पुनरमभिन्नरूपो वतिः क्वचित् प्रकृत्यर्थधर्मानन्यत्रातिदिशति क्वचित् सम्बन्धिधर्मान् ?
उच्यते यत्र 'तेन तुल्यं क्रिया चेद्वतिः' तत्र प्रकृत्यर्थधर्मान्; यत्र तु 'तत्र तस्येव' तत्राधेयसम्बन्धिधर्मानिति।
तदेवमुपमानेषु प्रसिद्धा धर्माः उपमेयेष्वारोप्यन्त इत्यतिदेशार्थः। प्रसिद्धिश्च क्वचिल्लोकापेक्षया, क्वचित्प्रयोक्त्रपेक्षया, क्वचित्प्रत्यक्षादिप्रमाणापेक्षयेति। तत्र लोकपेक्षया यथा—
जोण्हाए व्व मिअंकं कित्तीएँ सुअरिसं पहाए व्व रइं।
सेलं महाणई व सिरीअ चिरणिग्गआइ वि अमुच्चंतं॥ ७३॥
(ज्योत्स्ययेव मृगाङ्कं कीर्त्त्येव सुपुरुषं प्रभयेव रविम्।
शैलं महानद्येव श्रिया चिरनिर्गतयाप्यमुच्यमानम्॥)
यस्तवेह सवने न भूपतिः कर्म कर्मकरवत् करिष्यति।
तस्य नेष्यति वपुः कबन्धतां बन्धुरेष जगतां सुदर्शनः॥ ७४॥