भवतु । न मामयं गणयति । (पार्श्वमवलोक्य) कोऽत्र ऋषिपुमाराणाम् । (राजानमवलोक्य) भद्रमुख एहि तावत् । मोचयानेन दुर्मोचहस्तग्रहेण* डिम्भलीलया बाध्यमानं बालमृगेन्द्रम् । (*दुर्मोक)
(उपगम्य । सस्मितम्)अयि भो महर्षिपुत्र ।
एवमाश्रमविरुद्धवृत्तिना संयमः किमिति जन्मतस्त्वया । सत्त्वसंश्रय सुखोऽपि दूष्यते कृष्णसर्पशिशुनेव चन्दनः ॥
Metre: रथोद्धता
भद्रमुख न खल्वयम् ऋषिकुमारः ।
आकारसदृशं चेष्टितमेवास्य कथयति । स्थानप्रत्ययात्तु वयमेवं तर्किणः । (यथाभ्यर्थितमनुतिष्ठन्बालस्पर्शमुपलभ्य ।आत्मगतम्)
अनेन कस्य अपि कुलाङ्कुरेण स्पृष्टस्य गात्रेषु सुखं ममैवम् । कां निर्वृतिं चेतसि तस्य कुर्याद्यस्यायमङ्कात्कृतिनः प्ररूढः ॥
Metre: इन्द्रवज्रा
(उभौ निर्वर्ण्य)आश्चर्यमाश्चर्यम् ।
अस्य बालकस्य तेऽपि संवादिन्याकृतिरिति विस्मितास्मि ।अपरिचितस्य अपि तेऽप्रतिलोमः संवृत्त इति ।
(बालकमुपलालयन्) न चेन्मुनिकुमारोऽयमथ कोऽस्य व्यपदेशः ।