महीमहेन्द्रः खलु नैषधेन्दुः तद्वोधनीयः कथमित्थमेव । प्रयोजनं सांशयिकं प्रतीदृक्पृथग्जनेनेव स मद्विधेन ॥
Metre: उपजातिः
पितुर्नियोगेन निजेच्छया वा युवानमन्यं यदि वा वृणीषे । त्वदर्थमर्थित्वकृतिप्रतीतिः कीदृङ्मयि स्यान्निषधेश्वरस्य ॥
Metre: उपजातिः
त्वपायि किं शङ्कितविक्रियेऽस्मिन्नधिक्रिये वा विषये निदातुम् । इतः पृथक्प्रार्थयसे तु यद्यत्कुर्वे तदुर्वीपतिपुत्रि ! सर्वम् ॥
Metre: उपजातिः
श्रवःप्रविष्टा इव तद्गिरस्ता विधूय वैमत्यधुतेन मूर्ध्ना । ऊचे ह्रियोऽपि श्लथितानुरोधा पुनर्धरित्रीपुरुहूतपुत्री ॥
Metre: उपजातिः
मदन्यदानं प्रति कल्पना या वेदस्त्वदीये हृदि तावदेषा । निशोऽपि सोमेतरकान्तशङ्कामोंकारमग्रेसरमस्य कुर्याः ॥
Metre: उपजातिः
सरोजिनीमानसरागवृत्तेः अनर्कसंपर्कमतर्कयित्वा । मदन्यपाणिग्रहशङ्कितेयम् अहो महीयस्तव साहसिक्यम् ॥
Metre: उपेन्द्रवज्रा
साधु त्वया तर्कितमेतदेव स्वेनानलं यत्किल संश्रयिष्ये । विनामुना स्वात्मनि तु प्रहर्तुं मृषागिरं त्वां नृपतौ न कर्तुम् ॥
Metre: उपजातिः
मद्विप्रलभ्यं पुनराह यस्त्वां तर्कः स किं तत्फलवाचि मूकः । अशक्यशङ्काव्यभिचारहेतुः वाणी न वेदा यदि सन्तु के तु ॥
Metre: उपजातिः
अनैषधायैव जुहोति तातः किं मां कृशानौ न शरीरशेषाम् । ईष्टे तनूजन्मतनोः स नूनं मत्प्राणनाथस्तु नलस्तथापि ॥
Metre: उपजातिः
तदेकदासीत्वपदादुदग्रे मदीप्सिते साधु विधित्सुता ते । अहेलिनां किं नलिनी विधत्ते सुधाकरेणापि सुधाकरेण ॥
Metre: उपेन्द्रवज्रा