संसारेऽस्मिन्नसारे कुनृपति-भवन-द्वार-सेवा-कलङ्कव्यासङ्ग- व्यस्त-धैर्यं कथममल-धियो मानसं संविदध्युः । यद्येताः प्रोद्यद्-इन्दु-द्युति-निचय-भृतो न स्युरम्भोज-नेत्राः प्रेङ्खत्-काञ्ची-कलापाः स्तन-भर-विनमन्-मध्य-भाजस्तरुण्यः ॥
Metre: स्रग्धरा
सिद्धाध्यासित-कन्दरे हर-वृष-स्कन्धावरुग्ण-द्रुमे गङ्गा-धौत-शिला-तले हिमवतः स्थाने स्थिते श्रेयसि । कः कुर्वीत शिरः प्रणाम-मलिनं म्लानं मनस्वी जनो यद्-वित्रस्त-कुरङ्ग-शाव-नयना न स्युः स्मरास्त्रं स्त्रियः ॥
Metre: शार्दूलविक्रीडितम्
संसार तव पर्यन्त-पदवी न दवीयसी ।अन्तरा दुस्तरा न स्युर्यदि ते मदिरेक्षणाम् ॥
Metre: अनुष्टुप्
दिश वन-हरिणीभ्यो वंश-काण्ड-च्छवीनां कवलमुपल-कोटि-च्छिन्न-मूलं कुशानाम् । शक-युवति-कपोलापाण्डुताम्बूल-वल्लीदलमरुण-नखाग्रैः पाटितं वा वधूभ्यः ॥
Metre: मालिनी
असाराः सर्वे ते विरति-विरसाः पाप-विषया जुगुप्स्यन्तां यद्वा ननु सकल-दोषास्पदमिति । तथाप्येतद्-भूमौ नहि पर-हितात्पुण्यमधिकं न चास्मिन्संसारे कुवलय-दृशो रम्यमपरम् ॥
Metre: शिखरिणी
एतत्-काम-फलो लोके यद्द्वयोरेक-चित्तता ।अन्य-चित्त-कृते कामे शवयोरिव सङ्गमः ॥
Metre: अनुष्टुप्
मात्सर्यमुत्सार्य विचार्य कार्यमार्याः समर्यादमिदं वदन्तु । सेव्या नितम्बाः किमु भूधराणामत स्मर-स्मेर-विलासिनीनाम् ॥
Metre: उपजातिः
संसारे स्वप्न-सारे परिणति-तरले द्वे गती पण्डितानां तत्त्व-ज्ञानामृताम्भः-प्लव-ललित-धियां यातु कालः कथञ्चित् । नो चेन्मुग्धाङ्गनानां स्तन-जघन-घनाभोग-सम्भोगिनीनां स्थूलोपस्थ-स्थलीषु स्थगित-करतल-स्पर्श-लीलोद्यमानाम् ॥
Metre: स्रग्धरा
आवासः क्रियतां गङ्गे पाप-हारिणि वारिणि । स्तन-द्वये तरुण्या वा मनोहारिणि हारिणि ॥
Metre: अनुष्टुप्
किमिह बहुभिरुक्तैर्युक्ति-शून्यैः प्रलापैर्द्वयमिह पुरुषाणां सर्वदा सेवनीयम् ।अभिनव-मद-लीला-लालसं सुन्दरीणां स्तन-भर-परिखिन्नं यौवनं वा वनं वा ॥
Metre: मालिनी