शुभं वा यदि पापं यन्नॄणां हृदि संस्थितम् । सुगूढमपि तज्ज्ञेयं स्वप्न-वाक्यात्तथा मदात् ॥
Metre: अनुष्टुप्
अथवा स्त्रीणां विषये कोऽत्र सन्देहः । जल्पन्ति सार्धमन्येन पश्यन्त्यन्यं स-विभ्रमाः । हृद्-गतं चिन्तयन्त्यन्यं प्रियः को नाम योषिताम् ॥
एकेन स्मित-पाटलाधर-रुचो जल्पन्त्यनल्पाक्षरं वीक्षन्तेऽन्यमितः स्फुटत्-कुमुदिनी-फुल्लोल्लसल्-लोचनाः । दूरोदार-चरित्र-चित्र-विभवं ध्यायन्ति चान्यं धिया केनेत्थं परमार्थतोऽर्थवदिव प्रेमास्ति वाम-भ्रुवाम् ॥
Metre: शार्दूलविक्रीडितम्
नाग्निस्तृप्यति काष्ठानां नापगानां महोदधिः । नान्तकः सर्व-भूतानां न पुंसां वाम-लोचना ॥
Metre: अनुष्टुप्
रहो नास्ति क्षणो नास्ति नास्ति प्रार्थयिता नरः । तेन नारद नारीणां सतीत्वमुपजायते ॥
Metre: अनुष्टुप्
यो मोहान्मन्यते मूढो रक्तेयं मम कामिनी । स तस्या वशगो नित्यं भवेत्क्रीडा-शकुन्तवत् ॥
Metre: अनुष्टुप्
तासां वाक्यानि कृत्यानि स्वल्पानि सुगुरूण्यपि । करोति सः कृतैर्लोके लघुत्वं याति सर्वतः ॥
Metre: अनुष्टुप्