भवन्ति नम्रास्तरवः फलोद्गमैर्नवाम्बुभिर्दूरावलम्बिनो घनाः ।अनुद्धताः सत्-पुरुषाः समृद्धिभिः स्वभाव एष परोपकारिणाम् ॥
Metre: उपेन्द्रवज्रा
श्रोत्रं श्रुतेनैव न कुण्डलेन दानेन पाणिर्न तु कङ्कणेन । विभाति कायः करुण-पराणां परोपकारैर्न तु चन्दनेन ॥
Metre: उपजातिः
पापान्निवारयति योजयते हिताय गुह्यं निगूहति गुणान्प्रकटीकरोति ।आपद्-गतं च न जहाति ददाति काले सन्-मित्र-लक्षणमिदं प्रवदन्ति सन्तः ॥
Metre: वसन्ततिलका
पद्माकरं दिनकरो विकचीकरोति चम्द्र्प्वोलासयति कैरव-चक्रवालम् । नाभ्यर्थितो जलधरोऽपि जलं ददाति सन्तः स्वयं परहिते विहिताभियोगाः ॥
Metre: वसन्ततिलका
एके सत्-पुरुषाः परार्थ-घटकाः स्वार्थं परित्यजन्ति ये सामान्यास्तु परार्थमुद्यम-भृतः स्वार्थाविरोधेन ये । तेऽमी मानुष-राक्षसाः परहितं स्वार्थाय निघ्नन्ति ये ये तु घ्नन्ति निरर्थकं परहितं ते के न जानीमहे ॥
Metre: शार्दूलविक्रीडितम्
क्षीरेणात्मगतोदकाय हि गुणा दत्ता पुरा तेऽखिला क्षीरोत्तापमवेक्ष्य तेन पयसा स्वात्मा कृशानौ हुतः । गन्तुं पावकमुन्मनस्तदभवद्दृष्ट्वा तु मित्रापदं युक्तं तेन जलेन शाम्यति सतां मैत्री पुनस्त्वीदृशी ॥
Metre: शार्दूलविक्रीडितम्
इतः स्वपिति केशवः कुलमितस्तदीय-द्विषामितश्च शरणार्थिनां शिखरिणां गणाः शेरते ।इतोऽपि बडवानलः सह समस्त-संवर्तकैऋ अहो विततमूर्जितं भर-सहं सिन्धोर्वपुः ॥
Metre: पृथ्वी
तृष्णां छिन्धि भज क्षमां जहि मदं पापे रतिं मा कृथाः सत्यं ब्रूह्यनुयाहि साधु-पदवीं सेवस्व विद्वज्-जनम् । मान्यान्मानय विद्विषोऽप्यनुनय प्रख्यापय प्रश्रयं कीर्तिं पालय दुःखिते कुरु दयामेतत्सतां चेष्टितम् ॥
Metre: शार्दूलविक्रीडितम्
मनसि वचसि काये पुण्य-पीयूष-पूर्णास्त्रिभुवनमुपकार-श्रेणिभिः प्रीणयन्तः । पर-गुण-परमाणून्पर्वतीकृत्य नित्यं निज-हृदि विकसन्तः सन्त सन्तः कियन्तः ॥
Metre: मालिनी
किं तेन हेम-गिरिणा रजताद्रिणा वा यत्राश्रिताश्च तरवस्तरवस्त एव । मन्यामहे मलयमेव यद्-आश्रयेण कङ्कोल-निम्ब-कटुजा अपि चन्दनाः स्युः ॥
Metre: वसन्ततिलका