सुपूरा स्यात्कुनदिका सुपूरो मूषिकाञ्जलिः । सुसंतुष्टः कापुरुषः स्वल्पकेनापि तुष्यति ॥
Metre: अनुष्टुप्
किं तेन जातु जातेन माटुर्यौवन-हारिणा । आरोहति न यः स्वस्य वंशस्याग्रे ध्वजो यथा ॥
Metre: अनुष्टुप्
परिवर्तिनि संसारे मृतः को वा न जायते । जातस्तु गण्यते सोऽत्र यः स्फुरेच्च श्रियाधिकः ॥
Metre: अनुष्टुप्
जातस्य नदी-तीरे तस्यापि तृणस्य जन्म-साफल्यम् । यत्सलिल-मज्जनाकुल-जन-हस्तालम्बनं भवति ॥
Metre: आर्या (१२, १८, १२, १५)
स्तिमितोन्नत-सञ्चारा जन-सन्ताप-हारिणः । जायन्ते विरला लोके जलदा इव सज्जनाः ॥
Metre: अनुष्टुप्
निरतिशयं गरिमाणं तेन जनन्याः स्मरन्ति विद्वांसः । यत्कमपि वहति गर्भं महतामपि यो गुरुर्भवति ॥
Metre: आर्या (१२, १८, १२, १५)
अप्रकटीकृत-शक्तिः शक्तोऽपि जनस्तिरस्क्रियां लभते । निवसन्नन्तर्-दारुणि लङ्घ्यो वह्निर्न तु ज्वलितः ॥
Metre: आर्या (१२, १८, १२, १५)