शक्यो वारयितुं जलेन हुतभुक्च्छत्रेण सूर्यातपो नागेन्द्रो निशिताग्कुशेन समदो दण्डेन गो-गर्दभौ । व्याधिर्भेषज-सङ्ग्रहैश्च विविधैर्मन्त्र-प्रयोगैर्विषं सर्वस्यौषधमस्ति शास्त्र-विहितं मूर्खस्य नस्त्यौषधिम् ॥
Metre: शार्दूलविक्रीडितम्
साहित्य-सङ्गीत-कला-विहीनः साक्षात्पशुः पुच्छ-विषाण-हीनः । तृणं न खादन्नपि जीवमानस्तद्भाग-धेयं परमं पशूनाम् ॥
Metre: उपजातिः
येषां न विद्या न तपो न दानं ज्ञानं न शीलं न गुणो न धर्मः । ते मर्त्य-लोके भुवि भार-भूता मनुष्य-रूपेण मृगाश्चरन्ति ॥
Metre: उपजातिः
वरं पर्वत-दुर्गेषु भ्रान्तं वनचरैः सह । न मूर्ख-जन-सम्पर्कः सुरेन्द्र-भवनेष्वपि ॥
Metre: अनुष्टुप्
शास्त्रोपस्कृत-शब्द-सुन्दर-गिरः शिष्य-प्रदेयागमा विख्याताः कवयो वसन्ति विषये यस्य प्रभोर्निर्धनाः । तज्-जाड्यं वसुधादिपस्य कवयस्त्वर्थं विनापीश्वराः कुत्स्याः स्युः कुपरीक्षका हि मणयो यैरर्घतः पातिताः ॥
Metre: शार्दूलविक्रीडितम्
हर्तुर्याति न गोचरं किमपि शं पुष्णाति यत्सर्वदाऽप्यर्थिभ्यः प्रतिपाद्यमानमनिशं प्राप्नोति वृद्धिं पराम् । कल्पान्तेष्वपि न प्रयाति निधनं विद्याख्यमन्तर्धनं येषां तान्प्रति मानमुज्झत नृपाः कस्तैः सह स्पर्धते ॥
Metre: शार्दूलविक्रीडितम्
अधिगत-परमार्थान्पण्डितान्मावमंस्थास्तृणमिव लघु लक्ष्मीर्नैव तान्संरुणद्धि ।अभिनव-मद-लेखा-श्याम-गण्ड-स्थलानां न भवति बिसतन्तुर्वारणं वारणानाम् ॥
Metre: मालिनी
अम्भोजिनी-वन-विहार-विलासमेव हंसस्य हन्ति नितरां कुपितो विधाता । न त्वस्य दुग्ध-जल-भेद-विधौ प्रसिद्धां वैदग्धी-कीर्तिमपहर्तुमसौ समर्थः ॥
Metre: वसन्ततिलका
केयूराणि न भूषयन्ति पुरुषं हारा न चन्द्रोज्ज्वला न स्नानं न विलेपनं न कुसुमं नालङ्कृता मूर्धजाः । वाण्येका समलङ्करोति पुरुषं या संस्कृता धार्यते क्षीयन्ते खलु भूषणानि सततं वाग्-भूषणं भूषणम् ॥
Metre: शार्दूलविक्रीडितम्
विद्या नाम नरस्य रूपमधिकं प्रच्छन्न-गुप्तं धनं विद्या भोगकरी यशः-सुखकरी विद्या गुरूणां गुरुः । विद्या बन्धुजनो विदेश-गमने विद्या परा देवता विद्या राजसु पूज्यते न तु धनं विद्या-विहीनः पशुः ॥
Metre: शार्दूलविक्रीडितम्