अप्राप्त-कालं वचनं बृहस्पतिरपि ब्रुवन् । लभते बह्व्-अवज्ञानमपमानं च पुष्कलम् ॥
Metre: अनुष्टुप्
दुराराध्या हि राजानः पर्वता इव सर्वदा । व्यालाकीर्णाः सुविषमाः कठिना दुष्ट-सेविताः ॥
Metre: अनुष्टुप्
भोगिनः कञ्चुकाविष्टाः कुटिलाः क्रूर-चेष्टिताः । सुदुष्टा मन्त्र-साध्याश्च राजानः पन्नगा इव ॥
Metre: अनुष्टुप्
द्वि-जिह्वाः क्रूर-कर्माणोऽनिष्ठाश्छिद्रानुसारिणः । दूरतोऽपि हि पश्यन्ति राजानो भुजगा इव ॥
Metre: अनुष्टुप्
स्वल्पमप्यपकुर्वन्ति येऽभीष्टा हि महीपतेः । ते वह्नाविव दह्यन्ते पतङ्गाः पाप-चेतसः ॥
Metre: अनुष्टुप्
दुरारोहं पदं राज्ञां सर्व-लोक-नमस्कृतम् । स्वल्पेनाप्यपकारेण ब्राह्मण्यमिव दुष्यति ॥
Metre: अनुष्टुप्
दुराराध्याः श्रियो राज्ञां दुरापा दुष्परिग्रहाः । तिष्ठन्त्याप इवाधारे चिरमात्मनि संस्थिताः ॥
Metre: अनुष्टुप्
दमनक आह— सत्यमेतत्परम् । किन्तु—