अपि स्थाणुवदासीनः शुष्यन्परिगतः क्षुधा । न त्वज्ञानात्म-सम्पन्नाद्वृत्तिमीहते पण्डितः ॥
Metre: अनुष्टुप्
सेवकः स्वामिनं द्वेष्टि कृपणं परुषाक्षरम् । आत्मानं किं स न द्वेष्टि सेव्यासेव्यं न वेत्ति यः ॥
Metre: अनुष्टुप्
यस्याश्रित्य विश्रामं क्षुधार्ता यान्ति सेवकाः । सोऽर्कवन्नृपतिस्त्याज्यः सदा पुष्प-फलोऽपि सन् ॥
Metre: अनुष्टुप्
राज-मातरि देव्यां च कुमारे मुख्य-मन्त्रिणि । पुरोहिते प्रतीहारे सदा वर्तेत राजवत् ॥
Metre: अनुष्टुप्
जीवेति प्रब्रुवन्प्रोक्तः कृत्याकृत्य-विचक्षणः । करोति निर्विकल्पं यः स भवेद्राज-वल्लभः ॥
Metre: अनुष्टुप्
प्रभु-प्रसादजं वित्तं सुप्राप्तं यो निवेदयेत् । वस्त्राद्यं च दधात्यङ्गे स भवेद्राज-वल्लभः ॥
Metre: अनुष्टुप्
अन्तः-पुर-चरैः सार्धं यो न मन्त्रं समाचरेत् । न कलत्रैर्नरेन्द्रस्य स भवेद्राज-वल्लभः ॥
Metre: अनुष्टुप्
द्यूतं यो यम-दूताभं हालां हालाहलोपमम् । पश्येद्दारान्वृथाकारान्स भवेद्राज-वल्लभः ॥
Metre: अनुष्टुप्
युद्ध-कालेऽग्रणीर्यः स्यात्सदा पृष्ठानुगः पुरे । प्रभोर्द्वाराश्रितो हर्म्ये स भवेद्राज-वल्लभः ॥
Metre: अनुष्टुप्
सम्मतोऽहं विभोर्नित्यमिति मत्वा व्यतिक्रमेत् । कृच्छ्रेष्वपि न मर्यादां स भवेद्राज-वल्लभः ॥
Metre: अनुष्टुप्