तीक्ष्णोपाय-प्राप्ति-गम्योऽपि योऽर्थस्तस्याप्यादौ संश्रयः साधु युक्तः । उत्तुङ्गाग्रः सार-भूतो वनानां मान्याभ्यर्च्य च्छिद्यते पादपेन्द्रः ॥
Metre: शालिनी
अथवा स्वामिन् ! किं तेनाभिहितेन ? यदनन्तर-जाले क्रिया-रहितमसुख-साध्यं वा भवति । साधु चेदमुच्यते—
अनिश्चितैरध्यवसाय-भीरुभिर्यथेष्ट-संलाप-रति-प्रयोजनैः । फले विसंवादमुपागता गिरः प्रयान्ति लोके परिहास-वस्तुताम् ॥
Metre: वंशस्थम्
न च लघुष्वपि कर्तव्येषु धीमद्भिरनादरः कर्तव्यः । यतः—
शक्ष्यामि कर्तुमिदमल्पमयत्न-साध्यम् अनादरः क इति कृत्यमुपेक्षमाणाः । केचित्प्रमत्त-मनसः परिताप-दुःखम् आपत्-प्रसङ्ग-सुलभं पुरुषा प्रयान्ति ॥
Metre: वसन्ततिलका
तदद्य जितारेर्मद्-विभोर्यथा-पूर्वं निद्रा-लाभो भविष्यति । उच्यते चैतत्—
निःसर्पे बद्ध-सर्पे वा भवने सुष्यते सुखम् । सदा दृष्ट-भुजङ्गे तु निद्रा दुःखेन लभ्यते ॥
Metre: अनुष्टुप्
विस्तीर्ण-व्यवसाय-साध्य-महतां स्निघ्दोपयुक्ताशिषां कार्याणां नय-साहसोन्नति-मतामिच्छापद्-आरोहिणाम् । मानोत्सेक-पराक्रम-व्यसनिनः पारं न यावद्-गताः सामर्षे हृदयेऽवकाश-विषया तावत्कथं निर्वृतिः ॥
Metre: शार्दूलविक्रीडितम्
तदवसित-कार्यारम्भस्य विश्राम्यतीव मे हृदयम् । तदिदमधुना निहत-कण्टकं राज्यं प्रजा-पालन-तत्परो भूत्वा पुत्र-पौत्रादि-क्रमेणाचल-च्छत्रासन-श्रीः चिरं भुङ्क्ष्व । अपि च—