१. अङ्गारको मङ्गलः। वारो दिवसः। मङ्गलवार इत्यर्थः। कप्रत्ययोऽप्राशस्त्याय। तथा च माघो 'भौमदिवसमभिमन्वतेऽथवा भृशमप्रशस्तमपि मङ्गलं जनाः'।
स्वकीयसामान्यपुनर्भुवां च भिदां प्रपञ्चः स इवावबद्धः।
परस्परं प्रोषितभर्तृकादिभेदैर्विभिन्नोऽत्र निबन्धनीयः॥ ४३८॥
इति प्रपञ्चः कथितोऽङ्गनानां क्रमात् स्वकीयादिविभेदभिन्नः।
चतुष्प्रकारं तममुं निबन्धन् कविश्चतुर्वर्गफलं लभेत॥ ४३९॥
तदेतत् सर्वस्वं भुवनजयिनः पुष्पधनुषो मनुष्याणामेकं तदिदमसमं जीवितफलम् ।
इदं तत् सौख्यानां कुलभवनमाद्यं त्रिभुवने यदेतत् तारुण्योपहितमहिमानो मृगदृशः॥ ४४०॥
इति महाराजाधिराजश्रीभोजदेवविरचिते श्रृङ्गारप्रकाशे रत्यालम्बनविभावप्रकाशनो नाम । पञ्चदशः प्रकाशः॥ १५॥
प्राकृतबहलः सोऽयं प्रकाश आस्ते मनीषिणां निकषः। प्राकृतमपि खलु विविधस्वरूपमत्यन्तचिररूढम्॥