निरतिशयं गरिमाणं तेन जनन्याः स्मरन्ति विद्वांसः । यत्कमपि वहति गर्भं महतामपि यो गुरुर्भवति ॥
Metre: आर्या (१२, १८, १२, १५)
अप्रकटीकृत-शक्तिः शक्तोऽपि जनस्तिरस्क्रियां लभते । निवसन्नन्तर्-दारुणि लङ्घ्यो वह्निर्न तु ज्वलितः ॥
Metre: आर्या (१२, १८, १२, १५)
करटक आह—आवां तावदप्रधानौ तत्किमावयोरनेन व्यापरेण ।
अपृष्टोऽत्राप्रधानो यो ब्रूते राज्ञः पुरः कुधीः । न केवलमसंमानं लभते च विडम्बनम् ॥
Metre: अनुष्टुप्
वचस्तत्र प्रयोक्तव्यं यत्रोक्तं लभते फलम् । स्थायी भवति चात्यन्तं रागः शुक्ल-पटे यथा ॥
Metre: अनुष्टुप्
दमक आह- मा मैवं वद । अप्रधानः प्रधानः स्यात्सेवते यदि पार्थिवम् । प्रधानोऽप्यप्रधानः स्याद्यदि सेवा-विवर्जितः ॥
आसन्नमेव नृपतिर्भजते मनुष्यं विद्या-विहीनमकुलीनमसंस्कृतं वा । प्रायेण भूमि-पतयः प्रमदा लताश्च यत्पार्श्वतो भवति तत्परिवेष्टयन्ति ॥
Metre: वसन्ततिलका