मृग-मीन-सज्जनानां तृण-जल-सन्तोष-विहित-वृत्तीनाम् । लुब्धक-धीवर-पिशुना निष्कारण-वैरिणो जगति ॥
Metre: आर्या
वाञ्छा सज्जन-सङ्गमे पर-गुणे प्रीतिर्गुरौ नम्रता विद्यायां व्यसनं स्व-योषिति रतिर्लोकापवादाद्भयम् । भक्तिः शूलिनि शक्तिरात्म-दमने संसर्ग-मुक्तिः खले येष्वेते निवसन्ति निर्मल-गुणास्तेभ्यो नरेभ्यो नमः ॥
Metre: शार्दूलविक्रीडितम्
विपदि धैर्यमथाभ्युदये क्षमा सदसि वाक्य-पटुता युधि विक्रमः । यशसि चाभिरुचिर्व्यसनं श्रुतौ प्रकृति-सिद्धमिदं हि महात्मनाम् ॥
Metre: द्रुतविलम्बितम्
प्रदानं प्रच्छन्नं गृहमुपगते सम्भ्रम-विधिः प्रियं कृत्वा मौनं सदसि कथनं चाप्युपकृतेः ।अनुत्सेको लक्ष्म्यामनभिभव-गन्धाः पर-कथाः सतां केनोद्दिष्टं विषममसिधारा-व्रतमिदम् ॥
Metre: शिखरिणी
करे श्लाघ्यस्त्यागः शिरसि गुरु-पाद-प्रणयिता मुखे सत्या वाणी विजयि भुजयोर्वीर्यमतुलम् । हृदि स्वच्छा वृत्तिः श्रुतिमधिगतं च श्रवणयोर्विनाप्यैश्वर्येण प्रकृति-महतां मण्डनमिदम् ॥
Metre: शिखरिणी
सम्पत्सु महतां चित्तं भवत्युत्पल-कोमलम् ।आपत्सु च महाशैलशिला- सङ्घात-कर्कशम् ॥
Metre: अनुष्टुप्
सन्तप्तायसि संस्थितस्य पयसो नामापि न ज्ञायते मुक्ताकारतया तदेव नलिनी-पत्र-स्थितं राजते । स्वात्यां सागर-शुक्ति-मध्य-पतितं तन्-मौक्तिकं जायते प्रायेणाधम-मध्यमोत्तम-गुणः संसर्गतो जायते ॥
Metre: शार्दूलविक्रीडितम्
प्रीणाति यः सुचरितैः पितरं स पुत्रो यद्भर्तुरेव हितमिच्छति तत्कलत्रम् । तन्मित्रमापदि सुखे च सम-क्रियं यदेतत्त्रयं जगति पुण्य-कृतो लभन्ते ॥
Metre: वसन्ततिलका
एको देवः केशवो वा शिवो वा ह्येकं मित्रं भूपतिर्वा यतिर्वा ।एको वासः पत्तने वा वने वा ह्येका भार्या सुन्दरी वा दरी वा ॥
Metre: शालिनी
नम्रत्वेनोन्नमन्तः पर-गुण-कथनैः स्वान्गुणान्ख्यापयन्तः स्वार्थान्सम्पादयन्तो वितत-पृथुतरारम्भ-यत्नाः परार्थे । क्षान्त्यैवाक्षेप-रुक्षाक्षर-मुखर-मुखान्दुर्जनान्दूषयन्तः सन्तः साश्चर्य-चर्या जगति बहु-मताः कस्य नाभ्यर्चनीयाः ॥
Metre: स्रग्धरा