किं नाक्ष्णि नोऽपि क्षणिकोऽणुकोऽयं भानस्ति तेजोमयबिन्दुरिन्दुः । अत्रेस्तु नेत्रे घटते यदासीन्मासेन नाशी महतो महीयान् ॥
Metre: इन्द्रवज्रा
त्रातुं पतिं नौषधयः स्वशक्त्या मन्त्रेण विप्राः क्षयिणं न शेकुः । एनं पयोधिर्मणिभिर्न पुत्रं सुधा प्रभावैर्न निजाश्रयं वा ॥
Metre: उपजातिः
मृषा निशानाथमहः सुधा वा हरेदसौ वा न जराविनाशौ । पीत्वा कथं नापरथा चकोरा विधोर्मरीचीनजरामराः स्युः ॥
Metre: उपजातिः
वाणीभिराभिः परिपत्त्रिमाभिर्नरेन्द्रमानन्दजडं चकार । मुहूर्तमाश्चर्यरसेन भैमी हैमीव वृष्टिः स्तिमितं च तं सा ॥
Metre: उपजातिः
इतो मुखाद्वागियमाविरासीत्पीयूषधारामधुरेति जल्पन् । अचुम्बदस्याः स मुखेन्दुबिम्बं संवावदूकश्रियमम्बुजानाम् ॥
Metre: उपजातिः
प्रियेण साथ प्रियमेवमुक्ता विदर्भभूमीपतिवंशमुक्ता । स्मितांशुजालं विततार तारा दिवः स्फुरन्तीव कृतावतारा ॥
Metre: उपेन्द्रवज्रा
स्ववर्णना न स्वयमर्हतीति नियुज्य मां त्वन्मुखमिन्दुरूपम् । स्थानेऽत्युदास्ते शशिनः प्रशस्तौ धरातुरासाहमिति स्म साह ॥
Metre: उपजातिः
तयेरितः प्राणसमः सुमुख्या गिरं परीहासरसोत्किरां सः । भूलोकसारः स्मितवाक्तुषारभानुं भणिष्यन्सुभगां बभाण ॥
Metre: उपजातिः
तवानने जातचरीं निपीय गीतिं तदाकर्णनलोलुपोऽयम् । हातुं नु जातु स्पृहयत्यवैमि विधुं मृगस्त्वद्वदनभ्रमेण ॥
Metre: उपजातिः
इन्दोर्भ्रमेणोपगमाय योग्ये जिह्वा तवास्ये विधुवास्तुमन्तम् । गीत्या मृगं कर्षतु भन्त्स्यता किं पाशीबभूवे श्रवणद्वयेन ॥
Metre: इन्द्रवज्रा