प्रवृत्तेविकसद्ध्वानंसाधनेप्यविषादिभिः । ववृषेविकसद्दानंयुधमाप्यविषाणिभिः ॥
Metre: अनुष्टुप्
पुरः प्रयुक्तैर्युद्धं तच्चलितैर्लब्धशुद्धिभिः । आलापैरिव गान्धर्वमदीप्यत पदातिभिः ॥
Metre: अनुष्टुप्
केनचित्स्वासिनान्येषां मण्डलाग्रानवद्यता । प्रापे कीर्तिप्लुतमहीमण्डलाग्रानवद्यत ॥
Metre: अनुष्टुप्
विहन्तुं विद्विषस्तीक्ष्णः सममेव सुसंहतेः । परिवारात्पृथक्चक्रे खड्गश्चात्मा च केनचित् ॥
Metre: अनुष्टुप्
अन्येन विदधेऽरीणामतिमात्रा विलासिना । उद्गूर्णेन चमूस्तूर्णमतिमात्राविलासिना ॥
Metre: अनुष्टुप्
सहस्रपूरणः कश्चिल्लूनमूर्धासिना द्विषः । तथोर्ध्व एव काबन्धीमभजन्नर्तनक्रियाम् ॥
Metre: अनुष्टुप्
शस्त्रव्रणमयश्रीमदलङ्करणभूषषितः । ददृशेऽन्यो रावणवदलङ्करणभूषितः ॥
Metre: अनुष्टुप्
द्विषद्विशसनच्छेदनिरस्तोरुयुगोऽपरः । सिक्तश्चास्त्रैरुभयथा बभूवारुणविग्रहः ॥
Metre: अनुष्टुप्
भीमतामपरोऽम्भोधिसमेऽधित महाहवे । दाक्षे कोपः शिवस्येव समेधितमहा हवे ॥
Metre: अनुष्टुप्
दन्तौश्चिच्छिदिरे कोपात्प्रतिपक्षं गजा इव । परनिस्त्रिंशनिर्लूनकरवालाः पदातयः ॥
Metre: अनुष्टुप्