केशाः संयमिनः श्रुतेरपि परं पारं गते लोचने अन्तर्-वक्त्रमपि स्वभाव-शुचि-भीः कीर्णं द्विजानां गणैः । मुक्तानां सतताधिवास-रुचिरौ वक्षोज-कुम्भाविमावित्थं तन्वि वपुः प्रशान्तमपि तेरागं करोत्येव नः ॥
Metre: शार्दूलविक्रीडितम्
मुग्धे धानुष्कता केयमपूर्वा त्वयि दृश्यते । यया विध्यसि चेतांसि गुणैरेव न सायकैः ॥
Metre: अनुष्टुप्
सति प्रदीपे सत्यग्नौ सत्सु तारारवीन्दुषु । विना मे मृग-शावाक्ष्या तमो-भूतमिदं जगत् ॥
Metre: अनुष्टुप्
उद्वृत्तः स्तन-भार एष तरले नेत्रे चले भ्रू-लते रागाधिष्ठितमोष्ठ-पल्लवमिदं कुर्वन्तु नाम व्यथाम् । सौभाग्याक्षर-मालिकेव लिखिता पुष्पायुधेन स्वयं मध्यस्थापि करोति तापमधिकं रोमावलिः केन सा ॥
Metre: शार्दूलविक्रीडितम्
मुखेन चन्द्र-कान्तेन महानीलैः शिरोरुहैः । कराभ्यां पद्मरागाभ्यां रेजे रत्नमयीव सा ॥
Metre: अनुष्टुप्
गुरुणा स्तन-भारेण मुख-चन्द्रेण भास्वता । शनैश्-चराभ्यां पादाभ्यां रेजे ग्रहमयीव सा ॥
Metre: अनुष्टुप्
तस्याः स्तनौ यदि घनौ जघनं च हारि वक्त्रं च चारु तव चित्त किमाकुलत्वम् । पुण्यं कुरुष्व यदि तेषु तवास्ति वाञ्छा पुण्यैर्विना न हि भवन्ति समीहितार्थाः ॥
Metre: वसन्ततिलका
इमे तारुण्य-श्री-नव-परिमलाः प्रौढ-सुरतप्रताप- प्रारम्भाः स्मर-विजय-दान-प्रतिभुवः । चिरं चेतश्चोरा अभिनव-विकारैक-गुरवो विलास-व्यापाराः किमपि विजयन्ते मृग-दृशाम् ॥
Metre: शिखरिणी
प्रणय-मधुराः प्रेमोद्गारा रसाश्रयतां गताः फणिति-मधुरा मुग्ध-प्रायाः प्रकाशित-सम्मदाः । प्रकृति-सुभगा विस्रम्भार्द्राः स्मरोदय-दायिनी रहसि किमपि स्वैरालापा हरन्ति मृगीदृशाम् ॥
Metre: हरिणी
विश्रम्य विश्रम्य वन-द्रुमाणां छायासु तन्वी विचचार काचित् । स्तनोत्तरीयेण करोद्धृतेन निवारयन्ती शशिनो मयूखान् ॥
Metre: उपजातिः