मज्जत्वम्भसि यातु मेरु-शिखरं शत्रुं जयत्वाहवे वाणिज्यं कृषि-सेवने च सकला विद्याः कलाः शिक्षताम् ।आकाशं विपुलं प्रयातु खगवत्कृत्वा प्रयत्नं परं नाभाव्यं भवतीह कर्म-वशतो भाव्यस्य नाशः कुतः ॥
Metre: शार्दूलविक्रीडितम्
भीमं वनं भवति तस्य पुरं प्रधानं सर्वो जनः स्वजनतामुपयाति तस्य । कृत्स्ना च भूर्भवति सन्निधि-रत्न-पूर्णा यस्यास्ति पूर्व-सुकृतं विपुलं नरस्य ॥
Metre: वसन्ततिलका
को लाभो गुणिसङ्गमः किमसुखं प्राज्ञेतरैः सङ्गतिः का हानिः समय-च्युतिर्निपुणता का धर्म-तत्त्वे रतिः । कः शूरो विजितेन्द्रियः प्रियतमा काऽनुव्रता किं धनं विद्या किं सुखमप्रवास-गमनं राज्यं किमाज्ञा-फलम् ॥
Metre: शार्दूलविक्रीडितम्
अप्रिय-वचन-दरिद्रैः प्रिय-वचन-धनाढ्यैः स्व-दार-परितुष्टैः । पर-परिवाद-निवृत्तैः क्वचित्क्वचिन्मण्डिता वसुधा ॥
कदर्थितस्यापि हि धैर्य-वृत्तेर्न शक्यते धैर्य-गुणः प्रमार्ष्टुम् ।अधोमुखस्यापि कृतस्य वह्नेर्नाधः शिखा याति कदाचिदेव ॥
Metre: उपजातिः
कान्ताकटाक्ष-विशिखा न लुनन्ति यस्य चित्तं न निर्दहति किप-कृशानुतापः । कर्षन्ति भूरि-विषयाश्च न लोभ-पाशैर्लोक-त्रयं जयति कृत्स्नमिदं स धीरः ॥
Metre: वसन्ततिलका
एकेनापि हि शूरेण पादाक्रान्तं महीतलम् । क्रियते भास्करेणैव स्फार-स्फुरित-तेजसा ॥
Metre: अनुष्टुप्
वह्निस्तस्य जलायते जल-निधिः कुल्यायते तत्-क्षणान्मेरुः स्वल्प-शिलायते मृगपतिः सद्यः कुरङ्गायते । व्यालो माल्य-गुणायते विष-रसः पीयूष-वर्षायते यस्याङ्गेऽखिल-लोक-वल्लभतमं शीलं समुन्मीलति ॥
Metre: शार्दूलविक्रीडितम्
लज्जा-गुणौघ-जननीं जननीमिव स्वामत्यन्त-शुद्ध-हृदयामनुवर्तमानाम् । तेजस्विनः सुखमसूनपि सन्त्यजनति सत्य-व्रत-व्यसनिनो न पुनः प्रतिज्ञाम् ॥
Metre: वसन्ततिलका
शम्भु-स्वयम्भु-हरयो हरिणेक्षणानां येनाक्रियन्त सततं गृह-कुम्भ-दासाः । वाचामगोचर-चरित्र-विचित्रिताय तस्मै नमो भगवते मकर-ध्वजाय ॥
Metre: वसन्ततिलका