स्वदृशोर्जनयन्ति सान्त्वनां खुरकण्डूयनकैतवान्मृगाः । जितयोरुदयत्प्रमीलयोः तदखर्वेक्षणशोभया भयात् ॥
Metre: वियोगिनी
अपि लोकयुगं दृशावपि श्रुतदृष्टा रमणीगुणा अपि । श्रुतिगामितया दमस्वसुः व्यतिभाते सुतरां धरापते ! ॥
Metre: वियोगिनी
नलिनं मलिनं विवृण्वती पृषतीमस्पृशती तदीक्षणे । अपि खञ्जनमञ्जनाञ्चिते विदधाते रुचिगर्वदुर्विधम् ॥
Metre: वियोगिनी
अधरं किल बिम्बनामकं फलमस्मादिति भव्यमन्वयम् । लभतेऽधरबिम्बमित्यदः पदमस्या रदनच्छदं वदत् ॥
Metre: वियोगिनी
हृतसारमिवेन्दुमण्डलं दमयन्तीवदनाय वेधसा । कृतमध्यबिलं विलोक्यते धृतगम्भीरखनीखनीलिम ॥
Metre: वियोगिनी
धृतलाञ्छनगोमयाञ्चनं विधुमालेनपाण्डुरं विधिः । भ्रमयत्युचिटं विदर्भजानननीराजनवर्धमानकम् ॥
Metre: गीति
सुषमाविषये परीक्षणे निखिलं पद्ममभाजि तन्मुखात् । अधुनापि न मङ्गलक्षणं सलिलोन्मज्जनमुज्झति स्फुटम् ॥
Metre: वियोगिनी
धनुषी रतिपञ्चबाणयोः उदिते विश्वजयाय तद्भ्रुवौ । नलिके न तदुच्चनासिके त्वयि नालीकविमुक्तिकामयोः ॥
Metre: वियोगिनी
सदृशी तव शूर ! सा परं जलदुर्गस्थमृणालजिद्भुजा । अपि मित्रजुषां सरोरुहां गृहयालुः करलीलया श्रियः ॥
Metre: वियोगिनी
वयसी शिशुतातदुत्तरे सुदृशि स्वाभिविधिं विधित्सुनी । विधिनापि न रोमरेखया कृतसीम्नी प्रविभज्य रज्यतः ॥
Metre: वियोगिनी