नियुज्यमानेन पुरः कर्मण्यतिगरीयसि । आरोप्यमाणोरुगुणं भर्त्रा कार्मुकमानमत् ॥
Metre: अनुष्टुप्
तत्र बाणाः सुपरुषः समधीयन्त चारवः । द्विषामभूत्सुपरुषस्तस्याकृष्टस्य चारवः ॥
Metre: अनुष्टुप्
पश्चात्कृतानामप्यस्य नराणामिव पत्रिणाम् । योयो गुणेन संयुक्तः स स कर्णान्तमाययौ ॥
Metre: अनुष्टुप्
प्रपे रूपी पुरारेपाः परिपूरी परः परैः । रोपैरपारैरुपरि पुपूरेऽपि पुरोऽपरैः ॥
Metre: अनुष्टुप्
दिङ्मुखव्यापिनस्तीक्ष्णान्ह्रदिनो मर्मभेदिनः । चिक्षेपैकक्षणेनैव सायकानहितांश्च सः ॥
Metre: अनुष्टुप्
शरवर्षी महानादः स्फुरत्कार्मुककेतनः । नीलच्छविरसौ रेजे केशवच्छलनीरदः ॥
Metre: अनुष्टुप्
न केवलं जनैस्तस्य लघुसंधायिनो धनुः । मण्डलीकृतमोकान्ताद्बलमैक्षि द्विषामपि ॥
Metre: अनुष्टुप्
लोकालोकी कलोऽकल्ककलिलोऽलिकुलालकः । कालोऽकलोऽकलिः काले कोलकेलिकिलः किल ॥
Metre: अनुष्टुप्
अक्षितारासु विव्याध द्विषतः स तनुत्रिणः । दानेषु स्थूललक्ष्यत्वं न हि तस्य शरासने ॥
Metre: अनुष्टुप्
वररोऽविवरो वैरिविवारी वारिरारवः । विववार वरो वैरं वीरो रविरिवौर्वरः ॥
Metre: अनुष्टुप्