तद्विस्फुरत्फणविलोकनभूतभीतेः कम्पं च वीक्ष्य पुलकं च ततोनु तस्याः । संजातसात्विकविकारधियः स्वभृत्यान्नृत्यान्न्यषेधदुरगाधिपतिर्विलक्षाः ॥
Metre: वसन्ततिलका
तद्दर्शिभिः स्ववरणे फणिभिर्निराशैः निश्वस्य तत्किमपि सृष्टमनात्मनीनम् । यत्तान्प्रयातुमनसोऽपि विमानवाहा हा हा प्रतीपपवनाशकुनान्न जग्मुः ॥
Metre: वसन्ततिलका
ह्रीसंकुचत्फणगणादुरगप्रधानात्तां राजसङ्घमनयन्त विमानवाहाः । संध्यानमद्दलकुलात्कमलाद्विनीय कह्लारमिन्दुकिरणा इव हासभासम् ॥
Metre: वसन्ततिलका
देव्याभ्यधायि भव भीरु धृतावधाना भूमीभुजो भजत भीमभुवो निरीक्षाम् । आलोकितामपि पुनः पिबतां दृशैनाम् इच्छा विगच्छति न वत्सरकोटिभिर्वा ॥
Metre: वसन्ततिलका
लोकेशकेशवशिवानपि यश्चकार शृङ्गारसान्तरभृशान्तरशान्तभावान् । पञ्चेन्द्रियाणि जगतामिषुपञ्चकेन संक्षोभयन्वितनुतां वितनुर्मदं वः ॥
Metre: वसन्ततिलका
पुष्पेषुणा ध्रुवममूनिषुवर्षजप्तिहुंकारमन्त्रबलभस्मितशान्तशक्तीन् । शृङ्गारसर्गरसिकद्व्यणुकोदरि त्वं द्वीपाधिपान्नयनयोर्नय गोचरत्वम् ॥
Metre: वसन्ततिलका
स्वादूदके जलनिधौ सवनेन सार्धं भव्या भवन्तु तव वारिविहारलीलाः । द्वीपस्य तं पतिममुं भज पुष्करस्य निस्तन्द्रपुष्करतिरस्करणक्षमक्षि ॥
Metre: वसन्ततिलका
सावर्तभावभवदद्भुतनाभिकूपे स्वर्भौममेतदुपवर्तनमात्मनैव । स्वाराज्यमर्जयसि न श्रियमेतदीयाम् एतद्गृहे परिगृहाण शचीविलासम् ॥
Metre: वसन्ततिलका
देवः स्वयं वसति तत्र किल स्वयंभूः न्यग्रोधमण्डलतले हिमशीतले यः । स त्वां विलोक्य निजशिल्पमनन्यकल्पं सर्वेषु कारुषु करोतु करेण दर्पम् ॥
Metre: वसन्ततिलका
न्यग्रोधनादिव दिवः पतदातपादेः न्यग्रोधमात्मभरधारमिवावरोहैः । तं तस्य पाकिफलनीलदलद्युतिभ्यां द्वीपस्य पश्य शिखिपत्त्रजमातपत्रम् ॥
Metre: वसन्ततिलका