सव्य-दक्षिणयोर्यत्र विशेषो नास्ति हस्तयोः । कस्तत्र क्षणमप्यार्यो विद्यमान-गतिर्भवेत् ॥
Metre: अनुष्टुप्
काचे मणिर्मणौ काचो येषां बुद्धिर्विकल्पते । न तेषां सन्निधौ भृत्यो नाम-मात्रोऽपि तिष्ठति ॥
Metre: अनुष्टुप्
परीक्षका यत्र न सन्ति देशे नार्घन्ति रत्नानि समुद्रजानि । आभीर-देशे किल चन्द्रकान्तं त्रिभिर्वराटैर्विपणन्ति गोपाः ॥
Metre: उपजातिः
लोहिताख्यस्य च मणेः पद्मरागस्य चान्तरम् । यत्र नास्ति कथं तत्र क्रियते रत्न-विक्रयः ॥
Metre: अनुष्टुप्
निर्विशेषं यदा स्वामी समं भृत्येषु वर्तते । तत्रोद्यम-समर्थानामुत्साहः परिहीयते ॥
Metre: अनुष्टुप्
न विना पार्थिवो भृत्यैर्न भृत्याः पार्थिवं विना । तेषां च व्यवहारोऽयं परस्पर-निबन्धनः ॥
Metre: अनुष्टुप्
भृत्यैर्विना स्वयं राजा लोकानुग्रह-कारिभिः । मयूखैरिव दीप्तांशुस्तेजस्व्यपि न शोभते ॥
Metre: अनुष्टुप्
अरैः सन्धार्यते नाभिर्नाभौ चाराः प्रतिष्ठिताः । स्वामि-सेवकयोरेवं वृत्ति-चक्रं प्रवर्तते ॥
Metre: अनुष्टुप्
शिरसा विधृता नित्यं स्नेहेन परिपालिताः । केशा अपि विरज्यन्ते निःस्नेहाः किं न सेवकाः ॥
Metre: अनुष्टुप्
राजा तुष्टो हि भृत्यानामर्थ-मात्रं प्रयच्छति । ते तु संमान-मात्रेण प्राणैरप्युपकुर्वते ॥
Metre: अनुष्टुप्