रवि-निशाकरयोर्ग्रह-पीडनं गज-भुजङ्गमयोरपि बन्धनम् । मतिमतां च विलोक्य दरिद्रतां विधिरहो बलवानिति मे मतिः ॥
Metre: द्रुतविलम्बितम्
सृजति तावदशेष-गुणकरं पुरुष-रत्नमलङ्करणं भुवः । तदपि तत्-क्षण-भङ्गि करोति चेदहह कष्टमपण्डितता विधेः ॥
Metre: द्रुतविलम्बितम्
पत्रं नैव यदा करीर-विटपे दोषो वसन्तस्य किम्नोलूकोऽप्यवओकते यदि दिवा सूर्यस्य किं दूषणम् । धारा नैव पतन्ति चातक-मुखे मेघस्य किं दूषणम्यत्पूर्वं विधिना ललाट-लिखितं तन्मार्जितुं कः क्षमः ॥
Metre: शार्दूलविक्रीडितम्
नमस्यामो देवान्ननु हतविधेस्तेऽपि वशगा विधिर्वन्द्यः सोऽपि प्रतिनियत-कर्मैक-फलदः । फलं कर्मायत्तं यदि किममरैः किं च विधिना नमस्तत्-कर्मभ्यो विधिरपि न येभ्यः प्रभवति ॥
Metre: शिखरिणी
ब्रह्मा येन कुलालवन्नियमितो ब्रह्माड-भाण्डोदरे विष्णुर्येन दशावतार-गहने क्षिप्तो महा-सङ्कटे । रुद्रो येन कपाल-पाणि-पुटके भिक्षाटनं कारितः सूर्यो भ्राम्यति नित्यमेव गगने तस्मै नमः कर्मणे ॥
Metre: शार्दूलविक्रीडितम्
नैवाकृतिः फलति नैवअ कुलं न शीलं विद्यापि नैव न च यत्न-कृतापि सेवा । भाग्यानि पूर्व-तपसा खलु सञ्चितानि काले फलन्ति पुरुषस्य यथैव वृक्षाः ॥
Metre: वसन्ततिलका
वने रणे शत्रु-जलाग्नि-मध्ये महार्णवे पर्वत-मस्तके वा । सुप्तं प्रमत्तं विषम-स्थितं वा रक्षन्ति पुण्यानि पुराकृतानि ॥
Metre: उपजातिः
या साधूंश्च खलान्करोति विदुषो मूर्खान्हितान्द्वेषिणः प्रत्यक्षं कुरुते परीक्षममृतं हालाहलं तत्-क्षणात् । तामाराधय सत्-क्रियां भगवतीं भोक्तुं फलं वाञ्छितं हे साधो व्यसनैर्गुणेषु विपुलेष्वास्थां वृथा मा कृथाः ॥
Metre: शार्दूलविक्रीडितम्
गुणवदगुणवद्वा कुर्वता कार्य-जातं परिणतिरवधार्या यत्नतः पण्डितेन ।अतिरभस-कृतानां कर्मणामाविपत्तेर्भवति हृदय-दाही शल्य-तुल्यो विपाकः ॥
Metre: मालिनी
स्थाल्यां वैदूर्यमय्यां पचति तिलकणांश्चन्दनैरिन्धनौघैः सौवर्णैर्लाङ्गलाग्रैर्विलिखति वसुधामर्क-मूलस्य हेतोः । कृत्वा कर्पूर-खण्डान्वृत्तिमिह कुरुते कोद्रवाणां समन्तात्प्राप्येमां कर्म्-भूमिं न चरति मनुजो यस्तोप मन्द-भाग्यः ॥
Metre: स्रग्धरा