आप्यायनाद्वा रुचिभिः सुधांशोः शैत्यात्तमःकाननजन्मनो वा । यावन्निशायामथ घर्मदुःस्थस्तावद्व्रजत्यह्नि न शब्दपान्थः ॥
Metre: इन्द्रवज्रा
दूरेऽपि तत्तावकगानपानाल्लब्धावधिः स्वादुरसोपभोगे । अवज्ञयैव क्षिपति क्षपायाः पतिः खलु स्वान्यमृतानि भासः ॥
Metre: उपजातिः
अस्मिन्न विस्मापयतेऽयमस्मांश्चक्षुर्बभूवैष यदादिपुंसः । तदत्रिनेत्रादुदितस्य तन्वि कुलानुरूपं किल रूपमस्य ॥
Metre: उपजातिः
आभिर्मृगेन्द्रोदरि कौमुदीभिः क्षीरस्य धाराभिरिव क्षणेन । अक्षालि नीली रुचिरम्बरस्था तमोमयीयं रजनीरजक्या ॥
Metre: उपजातिः
पयोमुचां मेचकिमानमुच्चैरुच्चाटयामास ऋतुः शरद्या । अपारि वामोरु तयापि किंचिन्न प्रोञ्छितुं लाञ्छनकालिमाष्य ॥
Metre: उपजातिः
एकादशैकादशरुद्रमौलीनस्तं यतो यान्ति कलाः किमस्य । प्रविश्य शेषास्तु भवन्ति पञ्चपञ्चेषुतूणीमिषवोऽर्धचन्द्राः ॥
Metre: उपजातिः
निरन्तरत्वेन निधाय तन्वि तारासहस्राणि यदि क्रियेत । सुधांशुरन्यः स कलङ्कमुक्तस्तदा त्वदास्यश्रियमाश्रयेत ॥
Metre: उपजातिः
यत्पद्ममादित्सु तवाननीयां कुरङ्गलक्ष्मा च मृगाक्षि लक्ष्मीम् । एकार्थलिप्साकृत एष शङ्के शशाङ्कपङ्केरुहयोर्विरोधः ॥
Metre: उपजातिः
लब्धं न लेखप्रभुणापि पातुं पीत्वा मुखेन्दोरधरामृतं ते । निपीय देवैर्विघसीकृतायां घृणां विधोरस्य दधे सुधायाम् ॥
Metre: उपजातिः
एनं स बिभ्रद्विधुमुत्तमाङ्गे गिरीन्द्रपुत्रीपतिरोषधीशम् । अश्नाति घोरं विषमब्धिजन्म धत्ते भुजङ्गं च विमुक्तशङ्कः ॥
Metre: उपजातिः