तपःप्रभवात्प्रत्यक्षं सर्वमेव तत्रभवतः ।
अतः खलु मम नातिक्रुद्धो मुनिः ।
तथाप्यसौ प्रियमस्माभिः प्रष्टव्यः । कः कोऽत्र भोः । (प्रविश्य)
गालव इदानीमेव विहायसा गत्वा मम वचनात्तत्रभवते कण्वाय प्रियमावेदय यथा पुत्रवती शकुन्तला तत्शापनिवृत्तौ स्मृतिमता दुष्यन्तेन प्रतिगृहीतेति ।
यदाज्ञापयति भगवान् (इति निष्क्रान्तः)
वत्स त्वमपि स्वापत्यदारसहितः सक्युराखण्डलस्य रथमारुह्य ते राजधानीं प्रतिष्ठस्व ।
तव भवतु विडौजाः प्राज्यवृष्टिः प्रजासु त्वमपि विततयज्ञो वज्रिणं प्रीणयस्व । युगशतपरिवर्तानेवमन्योन्यकृत्यैर् नयतमुभयलोकानुग्रहश्लाघनीयैः ॥
Metre: मालिनी