वेत्रवति न खल्वन्तरा दृष्टा त्वया देवी ।
अथकिम् । पत्रहस्तां मां प्रेक्ष्य प्रतिनिवृत्ता ।
कार्यज्ञा कार्योपरोधं मे परिहरति ।
देव अमात्यो विज्ञापयति ।अर्थजातस्य गणनाबहुलतयैकमेव पौरकार्यमवेक्षितं तद्देवः पत्रारूढं प्रत्यक्षीकरोत्विति ।
इतः पत्रं दर्शय । (प्रतिहार्युपनयति)
(अनुवाच्य) कथम् । समुद्रव्यवहारी सार्थवाहो धनमित्रो नाम नौव्यसने विपन्नः ।अनपत्यश्च किल तपस्वी ।
राजगामी तस्यार्थसंचय इत्येतदमात्येन लिखितम् । कष्टं खल्वनपत्यता ।
वेत्रवति बहुधनत्वाद्बहुपत्नीकेन तत्रभवता भवितव्यम् ।
विचार्यतां यदि काचिदापन्नसत्त्वा तस्य भार्यासु स्यात् ।
देव इदानीमेव साकेतकस्य श्रेष्ठिनो दुहिता निर्वृत्तपुंसवना जायास्य श्रूयते ।
ननु गर्भः पित्र्यं रिक्थमर्हति । गच्छ ।एवममात्यं ब्रूहि ।