तवापि हा हा विरहात्क्षुधाकुलाः कुलायकूलेषु विलुठ्यतेषु ते । चिरेण लब्धा बहुभिर्मनोरथैर्गताः क्षणेनास्फुटितेक्षणा मम ॥
Metre: वंशस्थम्
सुताः ! कमाहूय चिराय चुंकृतैर्विधाय कम्प्राणि मुखानि कं प्रति । कथासु शिष्यध्वमिति प्रमील्य सः स्त्रुतस्य सेकाद्बुबुधे नृपाश्रुणः ॥
Metre: वंशस्थम्
इत्थममुं विलपन्तममुञ्चद्दीनदयालुतयावनिपालः । रुपमदर्शि धृतोऽसि यदर्थं गच्छ यथेच्छमथेत्यभिधाय ॥
Metre: आर्यागीति
आनन्दजाश्रुभिरनुस्रियमाणमार्गान्प्राक्शोकनिर्गमितनेत्रपयःप्रवाहान् । चक्रे स चक्रनिभचङ्क्रमणच्छलेन नीराजनां जनयतां निजबान्धवानाम् ॥
Metre: वसन्ततिलका
श्रीहर्षं कविराजराजिमुकुटालंकारहीरः सुतं श्रीहीरः सुषुवे जितेन्द्रियचयं मामल्लदेवी च यम् । तच्चिन्तामणिमन्त्रचिन्तनफले शृङ्गारभङ्ग्या महाकाव्ये चारुणि नैषधीयचरिते सर्गोऽयमादिर्गतः ॥
Metre: शार्दूलविक्रीडितम्