अथ नलस्य गुणं गुणमात्मभूः सुरभि तस्य यशः कुसुमं धनुः । श्रुतिपथोपगतं सुमनस्तया तमिषुमाशु विधाय जिगाय ताम् ॥
Metre: द्रुतविलम्बितम्
यदतनुज्वरभाक्तनुते स्म सा प्रियकथासरसीरसमज्जनम् । सपदि तस्य चिरान्तरतापिनी परिणतिर्विषमा समपद्यत ॥
Metre: द्रुतविलम्बितम्
ध्रुवमधीतवतीयमधीरतां दयितदूतपतद्गतवेगतः । स्थितिविरोधकरीं द्व्यणुकोदरी तदुदितः स हि यो यदनन्तरः
Metre: द्रुतविलम्बित
अतितमां समपादि जडाशयं स्मितलवस्मरणेऽपि तदाननम् । अजनि पङ्गुरपाङ्गनिजाङ्गणभ्रमिकणेऽपि तदीक्षणखञ्जनः ॥
Metre: द्रुतविलम्बितम्
किमु तदन्तरुभौ भिषजौ दिवः स्मरनलौ विशतः स्म विगाहितुम् । तदभिकेन चिकित्सितुमाशु तां मखभुजामधिपेन नियोजितौ ॥
Metre: द्रुतविलम्बितम्
कुसुमचापजतापसमाकुलं कमलकोमलमैक्ष्यत तन्मुखम् । अहरहर्वहदभ्यधिकाधिकां रविरुचिग्लपितस्य विधोर्विधाम् ॥
Metre: द्रुतविलम्बित
तरुणतातरणिद्युतिनिर्मितद्रढिम तत्कुचकुम्भयुगं तदा । अनलसंगतितापमुपैतु नो कुसुमचापकुलालविलासजम् ॥
Metre: द्रुतविलम्बितम्
अधृत यद्विरहोष्मणि मज्जितं मनसिजेन तदूरुयुगं तदा । स्पृशति तत्कदनं कदलीतरुः यदि मरूज्वलदूषरदूषितः ॥
Metre: द्रुतविलम्बित
स्मरशराहतिनिर्मितसंज्वरं करयुगं हसति स्म दमस्वसुः । अनपिधानपतत्तपनातपं तपनिपीतसरःसरसीरुहम् ॥
Metre: द्रुतविलम्बित
मदनतापभरेण विदीर्य नो यदुदपाति हृदा दमनस्वसुः । निबिडपीनकुचद्वययन्त्रणा तम=पराधमधात्प्रतिबध्नती ॥
Metre: द्रुतविलम्बित